Main Engine Control (9) - Cannot Transfer Port Bridge Control

ဒီတစ်ခါတော့ Bunker barge တစ်စီးမှာပါ။ သင်္ဘောရဲ့ ME Control ကို Bridge ဆီ Transfer လုပ်မရဘူးပြောပါတယ်။ အင်ဒို စက်ချုပ်က ECR ထဲမှာ လိုက်ပြပါတယ်။

Control က Yanmar ရဲ့ control ပါ။ ဒီသင်္ဘောမှာလည်း အင်ဂျင် နှစ်လုံး ရှိပါတယ်။ Engine Control ကို ECR ထဲကနေ selector switch လေးနဲ့ ရွေးပေးရပါတယ်။ အခုပြဿနာဖြစ်တာက Port ဆိ​ုတော့ ကောင်းနေတဲ့ Stbd နဲ့ စမ်းပြပါတယ်။ 

Selector switch ကို Wheel House ကို ရွှေ့လိုက်တော့ Control Transfer indicator နေရာမှာ WH မီးလုံးလေး မှိတ်တုတ် မှိတ်တုတ် ဖြစ်နေပါတယ်။ Bridge ပေါ်က တစ်ယောက်ကနေ Confirm လုပ်လိုက်တော့မှ မီးလုံက ငြိမ်ပြီးလင်းနေပါတယ်။ Port Control မှာတော့ မီးလုံးက blink ဖြစ်နေပြီး ရပ်မသွားတော့ဘူး ပြောပါတယ်။ WH ရဲ့ acknowledgement ခလုတ်ကို မသိဘူး ဖြစ်နေတဲ့ သဘောပါ။ လောလောဆယ်တော့ စက်ချုပ်က မောင်းလို့ရအောင် ကျော်ထားတယ်တဲ့။ ဘယ်လို ကျော်တယ်ဆိုတာ လိုက်ပြပါတယ်။ ER ထဲက နံရံမှာ လေပိုက်တွေနဲ့ Solenoid တွေ တွေ့ပါတယ်။ ဘေးနားက junction box ကို ဖွင့်ပြပါတယ်။ အထဲမှာ terminal block နဲ့ wire ကြိုးတွေဆက်ထားပါတယ်။ အဲဒီထဲက အဝင် ကြိုးနှစ်ချောင်း ဖြုတ်ပြီး တစ်နေရာက ကြိုး နှစ်ချောင်း loop လုပ်ပြီး ဆက်ထားတာ တွေ့ရပါတယ်။ အဲဒါ စက်ချုပ်က သူလုပ်ထားတာတဲ့။ Control transfer လုပ်လိုက်ရင် အဲဒီ solenoid ဆီ power ရောက်ရမယ်တဲ့။ Port အတွက် Solenoid ဆီ power မရောက်လို့ Stbd Solenoid အတွက် Power ကြိုးနှစ်ချောင်းကို loop လုပ်ပြီး Port solenoid မှာ လာပေးထားတာပါ။ လောလောဆယ် Bridge Control နဲ့ Engine မောင်းချင်ရင် Stbd Control transfer ကို Bridge ပေးလိုက်တာနဲ့ Port ရော Stbd နှစ်ဘက်လုံးကို မောင်းလို့ ရတယ် ဆိုပါတယ်။

ဒါက လက်ရှိ အခြေအနေပါ။ ပြဿနာရဲ့ အဖြေ မရှာခင် System အလုပ်လုပ်ပုံ နားလည်အောင် အရင် လိုက်ကြည့်ပါတယ်။

ဒီသင်္ဘောမှာ Remote control ကို pneumatic နဲ့ လုပ်ထားပါတယ်။ Main air line ကို စောစောက Solenoid တွေနဲ့ ဖွင့်ပိတ်လုပ်ပြီး Bridge ကို ပို့လိုက်ပါတယ်။ Bridge မှာရှိတဲ့ Control Handle အောက်ဘက်မှာ အဲဒီလေပိုက်က ဝင်ပါတယ်။ ပြီးမှ Handle position အလိုက် Ahead / Astern ၊ လေ pressure အနည်းအများ ကို အထွက်ပိုက်တွေနဲ့ Engine ကို control လုပ်ပါတယ်။ ဒီတော့ Handle အဝင် လေရမှ control လုပ်နိုင်မှာမို့ စောစောက solenoid မှာ power ရဖို့ လိုပါတယ်။ Solenoid အထွက်နားက pressure switch တစ်ခုစီက control transfer successful ဖြစ်မဖြစ် feedback signal ပြန်ပေးပြီး blink ဖြစ်နေတဲ့ မီးလုံးကို ငြိမ်အောင် လုပ်ပေးတာပါ။

လိုအပ်တဲ့ Drawing တွေရှာ ဖတ်ပြီး Bridge မှာ စစ်ကြည့်ပါတယ်။ ဖြစ်နိုင်ချေ သိပ်များများ မရှိပါဘူး။ Confirm လုပ်ပေးမယ့် ခလုတ် မကောင်းလို့လား၊ Confirm အတွက် Relay RY263 ဆိုတာ မကောင်းလို့လား။ သူ့အတွက် လမ်းကြောင်းမှာ တစ်ခုခု ဖြတ်ထားလို့လား။ တစ်ခုစီ စစ်ကြည့်ရပါမယ်။ 

အလွယ်ဆုံးဖြစ်တဲ့ ခလုတ်ကို Continuity တိုင်းပါတယ်။ Open ပြပါတယ်။ နှိပ်လိုက်တော့ Close ဆိုတော့ ခလုတ်ကောင်းတယ်ပေါ့။ နောက်တစ်ခုစစ်ဖို့ RY263 relay ကို လိုက်ရှာရပါတယ်။ နောက်ဆုံး WH console အောက်ခြေဘေးနံရံမှာ တွေ့ပါတယ်။ ဒီတစ်ခါ ECR ကနေ control transfer လုပ်ခိုင်းလိုက်ပါတယ်။ Buzzer မြည်သံကြားရပြီး Confirm ခလုတ်ထဲက မီးလေး blink ဖြစ်နေပါတယ်။ Confirm ခလုတ်နှိပ်ပေမဲ့ ငြိမ်မသွားပါဘူး။ RY263 relay ကပ်မသွားပါဘူး။ Confirm ခလုတ် အဝင်ကို (-ve) ကနေ Voltage လှမ်းတိုင်းကြည့်တော့ 24V DC ရှိပါတယ်။ Circuit ပြန်ကြည့်တော့ Confirm ခလုတ်နဲ​့ Coil ကြားထဲမှာ RY2N ဆိုတဲ့ NO contact တစ်ခု ရှိနေပါတယ်။ အဲဒီ RY2N relay အဝင်မှာ Limit switch နှစ်ခု (NC) Series ချိတ်ထားပါတယ်။ Control handle အောက်က Neutral position မဟုတ်ရင် activate လုပ်ပေးတဲ့ limit switch နှစ်ခုပါ။ သိချင်တာနဲ့ အဲဒီ limit switch နှစ်ခုကို crocodile clip လေးနဲ့ခွပြီး ကျော်လိုက်ပါတယ်။ အဲဒီတော့ RY2N active ဖြစ်သွားပါတယ်။ Confirm ခလုတ်လေး နှိပ်လိုက်တော့ RY263 ဆွဲသွားသလို Blink မီးလုံးလေး ငြိမ်သွားပါတယ်။ Buzzer သံလည်း ပျောက်သွားပါပြီ။ ဒါဆို ရသွားပြီပေါ့။ သေချာအောင် နောက်တစ်ခေါက် ပြန်စမ်းပါတယ်။ Control transfer လုပ်ပြီးတာနဲ့ ER ထဲ ဆင်းသွားပြီး စောစောက စက်ချုပ် ကျော်ထားတဲ့ Port Side solenoid အတွက် ကြိုးနှစ်စမှာ voltage တိုင်းကြည့်တော့ 24V DC ထွက်နေပါပြီ။

ဒီတစ်ခါ limit switch နှစ်ခုထဲက မကောင်းတာတော့ သိရပြီ ခက်တာက အဲဒီ switch တပ်ထားတဲ့ နေရာက ထိဖို့ ဖြုတ်ဖို့ မလွယ်တဲ့ ကြားထဲမှာ ဖြစ်နေပါတယ်။ Pneumatic type ဆိုတော့ Control Handle က လေပိုက်တွေနဲ့ တစ်ဆက်ထဲ ဖြစ်နေလို့ ဖြုတ်ရတာ ပိုခက်ပါတယ်။ မတတ်နိုင်ဘူး စက်ချုပ်နဲ့ နှစ်ယောက်သား Handle အပေါ်ကနေ တစ်ခုစီ သတိထား ဖြုတ်ထုတ်တော့ Limit switch နှစ်ခု ထိုင်ထားတဲ့ plate ထွက်လာပါတယ်။

တိုင်းကြည့်တော့ Switch နှစ်ခုလုံး NC contact တွေ သိပ် မထိတော့ပါဘူး။ သင်္ဘောပေါ်မှာ Spare မရှိလို့ နောက်မှ လဲဖို့ အကြံပေးခဲ့ပါတယ်။

ဝင်းအောင် (ပခုက္ကူ)

၂၆-၂-၂၀၂၀

Main Engine Control (8) - Port Side Remote Control not Working

ပြဿနာကတော့ ရိုးရိုးလေးပါ။ Main Engine Control အကြောင်း ပြောစရာကြုံတာနဲ့ ပြောလိုက်တာပါ။ Tanker တစ်စီးမှာ Main Engine Control Ahead မရလို့ သွားကြည့်ရပါတယ်။ ဒီသင်္ဘောမှာ Engine နှစ်လုံး ရှိပါတယ်။ အခု ပြဿနာတက်နေတာက Port Side ဘက်ကပါ။ Bridge ကနေ မောင်းရင် အလုပ်မလုပ်ဘူး။ Local ကတော့ အလုပ် လုပ်တယ် ပြောပါတယ်။

ပထမဆုံး သုံးထားတဲ့ စနစ်ကို ကြည့်ပါတယ်။ Bridge ကနေ Lever ကို ကစားလိုက်ရင် Ahead / Astern ကို 24V electrical signal နဲ့ ပေးပါတယ်။ ပြီးမှ Engine ဘေးမှာ ရှိတဲ့ Pneumatic box ထဲက solenoid တွေကို ဖွင့်ပိတ်လုပ်ပြီး လေအားကို ပိုက်သုံးချောင်းနဲ့  gear box ဆီပို့ပေးပါတယ်။ Ahead တစ်ချောင်း၊ Astern တစ်ချောင်း နဲ့ Common return တစ်ချောင်းပါ။ အဲဒီ လေတွန်းအားနဲ့ Actuator block မှာ Gear oil / hydraulic line ကို ဖွင့်၊ ပိတ် လုပ်ပြီး Ahead သို့ Astern ရွေး ပေးပါတယ်။ 

Speed / governor control အတွက်က နောက် တစ်ပိုင်းပါ။ IP converter နဲ့ pneumatic proportional valve သုံးထားပါတယ်။ အခု ahead /astern တောင် ပြောင်းလို့ မရဘူးဆိုတော့ gear box အဝင် အပိုင်းကို အဓိကထား စစ်ပါမယ်။ 

Pneumatic box ရဲ့ ကျောဘက်မှာ Local control box တစ်ခု ရှိပါတယ်။ အဲဒီမှာတော့ လျှပ်စစ်အပိုင်း မပါပဲ လေလိုင်းတွေကို manual control valve တွေနဲ့ bridge / local / Off ရွေးတာ၊ ahead / neutral / astern ရွေးတာတွေ လုပ်ပေးနိုင်ပါတယ်။ သူ့ဆီက pipe တချို့ pneumatic box ဘက် ဝင်သွားပြီး အဲဒီဘက်မှာ solenoid တွေနဲ့ remote control လုပ်ထားပါတယ်။ အစဆုံး Engine မမောင်းပဲ စမ်းပါတယ်။ Bridge control ပေးလိုက်တာနဲ့ အဝင် လေပိုက်လိုင်းက pneumatic box ဆီ ဝင်လာပါတယ်။ အဲဒီမှာ main solenoid တစ်ခုက ဖွင့်ပေးပြီး solenoid အထွက်မှာ pressure switch တစ်ခုနဲ့ လေ ရ၊မရ စစ်ပါတယ်။ မရင် Control Air Missing Alarm ပေးပါမယ်။ အခု အဲဒီ solenoid အလုပ်လုပ်သွားတာရယ်၊ control air alarm မထွက်တာရယ်ကြောင့် confirm လုပ်လိုက်ပါတယ်။ လိုအပ်တဲ့ လေ pressure အပြည့် အဲဒီအထိ ရောက်နေပါပြီ။

အဲဒီနေရာကနေ T-joint နဲ့ လေပိုက် နှစ်ခု ခွဲထွက်သွားပါတယ်။ တစ်ခုက Ahead ၊ နောက်တစ်ခုက Astern ဆိုပြီး solenoid တစ်ခုစီနဲ့ ထိန်းချုပ်ပါတယ်။ ဒီတော့ Bridge ကနေ Ahead ရွှေ့ခိုင်းလိုက်ပါတယ်။ Ahead solenoid မီးလင်းသွားပါတယ်။ Gear box ဆီသွားကြည့်တော့ Actuator block က မရွေ့ပါဘူး။ ဒါနဲ့ Solenoid အထွက် လေပိုက် အဆက်တစ်ခု ဖြုတ်ကြည့်တော့ လေမထွက်ပါဘူး။ တစ်ခါ သေချာအောင် solenoid အဝင် power တိုင်းကြည့်တော့ 24V DC ရှိပါတယ်။ ထပ်ပြီး သေချာအောင် solenoid အဝင် လေပိုက်ကို နည်းနည်း လျော့ဖွင့်ကြည့်တော့ လေရှိနေပါတယ်။ ဒါဆို Solenoid မကောင်းတာ သေချာပါတယ်။

နောက်တစ်ခါ Astern ကို ရွှေ့ကြည့်တော့ အလုပ်လုပ်ပါတယ်။ Actuator block လည်း ရွေ့သွားတာ တွေ့ရပါတယ်။

ကြားဖြတ်ပြောချင်တာက Direction feedback ပါ။ တချို့ သင်္ဘောတွေမှာတော့ ahead / astern solenoid တွေရဲ့ အထွက်မှာ Pressure switch တစ်ခုစီနဲ့ direction feedback ပေးပါတယ်။ ဒီမှာတော့ actuator block က ထွက်တဲ့ Hydraulic line မှာမှ pressure switch တစ်ခုစီ တပ်ထားပါတယ်။ အဲဒီ pressure switch တွေ မှန်မှန်ကန်ကန် activate မလုပ်ရင် Wrong Direction alarm ပေးပါတယ်။

ထားပါတော့။ အခု သင်္ဘောမှာ မေးကြည့်တော့ Spare solenoid ရှိတာနဲ့ လဲလိုက်ပါတယ်။ စက်ချုပ်ပြောတာက ahead ဘက်က Solenoid ကို သူတို့ လဲထားတာ မကြာသေးဘူး ဆိုပါတယ်။

ပြီးတာနဲ့ စက်မောင်းခိုင်းပြီး စမ်းကြပါတယ်။ Ahead - ရှေ့ဘက်လည်သွားတယ်။ အဆင်ပြေပါတယ်။ Neutral - ရပ်သွားတယ်။ Astern - နောက်ပြန်လည်တယ်။ Neutral - မရပ်ဘူး။ ဆက်လည်နေတယ်။ ဒါနဲ့ Actuator block မှာ သွားကြည့်တော့ မောင်းတံလေးက Astern position မှာပဲ ရှိနေပါတယ်။ လက်နဲ့ ဆွဲချလိုက်တော့ အလယ်ကောင် neutral ပြန်ရောက်သွားတယ်။ Shaft လည်တာလည်း ရပ်သွားတယ်။

သေချာအောင် တစ်ခေါက် ထပ်စမ်းတော့ အဆင်ပြေတယ်။ တတိယတစ်ခါမှာ ကပ်နေပြန်ပါတယ်။ အဲဒီ အချိန် astern solenoid အထွက် လေပိုက် ဖြုတ်ကြည့်တော့ Solenoid ဘက်က လေမထွက်တာ သေချာပါတယ်။

ဒါနဲ့ စက်ချုပ်ကို ပြောပြပါတယ်။ Actuator block က internal leak ဖြစ်တာလို့ ယူဆတယ်။ ဖြုတ်ပြီး Service လုပ်ဖို​့ လိုမယ်လို့။ အဲဒီအချိန် တရုတ် Super ကလည်း on board ရှိနေတော့ သူတို့ဖြုတ်ချပြီး service လုပ်ပါတယ်။ ပြန်တပ်ပြီး စမ်းကြတော့ ပိုဆိုးပါတယ်။ အရင်က တစ်ခါတလေမှ ကပ်တာ။ အခု အမြဲကပ်နေပါတယ်။ Astern မောင်းပြီးရင် Neutral ပြန်ချမရတော့ဘူး။ Super ကို မေးကြည့်တယ်။ သူ service လုပ်တုန်းက O-Ring တွေ အခြေအနေကောင်းလား ဆိုတော့။ နည်းနည်းတော့ ပြားနေတယ်တဲ့။ Spare မရှိလို့ ဒီအတိုင်း ပြန်တပ်လိုက်တယ် ဆိုပါတယ်။ 

ဒါပေမဲ့ Super ကလည်း ဘောလုံးပုတ်တာ တော်တယ်။ Local  mode ကိုပြောင်းပြီး သုံးတော့ ပုံမှန် အလုပ်လုပ်တယ်။ Remote control မှာ Solenoid နဲ့ လုပ်တော့မှ ရပ်လို့မရတာဆိုတော့ electrical ပိုင်းက တစ်ခုခု ကြောင့်လို့ ယိုးစွပ်ပါတယ်။ ကျွန်တော် ထပ်စစ်ကြည့်တော့ solenoid လေ အဝင်အထွက်ကလည်း ကောင်းပါတယ်။ ကျွန်တော်တို့ နောက်နေ့မှ ပြန်တက်ဖို့ စီစဉ်ခဲ့ပါတယ်။

နောက်နေ့မှာ ကျွန်တော် Mechanical သမားတစ်ယောက် ခေါ်ခဲ့ပါတယ်။ Worksop မှာ Service လုပ်ထားတဲ့ actuator block တစ်ခုလည်း ယူခဲ့ပါတယ်။ သင်္ဘောပေါ်ရောက်တော့ စက်ချုပ်နဲ့ Super ရဲ့ သဘောတူညီချက် ယူပြီး Stbd ဘက်က Engine ရဲ့ Actuator block နဲ့ Port side က Actuator block ဖြုတ်လဲခိုင်းပါတယ်။ စက်နှိုးပြီး bridge control နဲ့ စမ်းကြည့်တဲ့အခါ Port Side Engine က ပုံမှန် အလုပ်လုပ်နေပြီး Stbd ဘက်က Astern သွားပြီး ပြန်ရပ်မရတော့ပါဘူး။ ဒါဆို ဒီ Actuator Block ကြောင့်ဆိုတာ သေချာ သွားပြီပေါ့။ Stbd ဘက်ကဟာကို သူ့မူရင်း ပစ္စည်း ပြန်တပ်ပေးလိုက်ပါတယ်။ Port Side ကိုတော့ ကျွန်တော်တို့ယူလာတဲ့ ပစ္စည်းနဲ့ တပ်ပြီး ပြန်စမ်းကြည့်ပါတယ်။ နှစ်ဘက်လုံး ပုံမှန် အလုပ်လုပ်တာ သေချာမှ ဖြုတ်ထားတဲ့ Actuator block ကို Workshop ပြန်ယူခဲ့ပါတယ်။ သင်္ဘော နောက်တစ်ခေါက်လာမှ Service လုပ်ပြီး ပြန်လဲဖို့ သဘောတူခဲ့ပါတယ်။

ဝင်းအောင် (ပခုက္ကူ)

၂၃-၂-၂၀၂၀

Main Engine Control (7) - Cannot run in dead slow

နည်းနည်းတော့ ကြာသွားပြီ။ Tanker တစ်စီးရဲ့ ME control မှာ Dead slow နဲ့  မောင်းမရဘူးလို့ ဆိုပါတယ်။ အင်ဒိုက မြို့လေးတစ်ခုဆီ ခရီး အဆင့်ဆင့်သွားပြီး ကြည့်ပေးခဲ့ရပါတယ်။ သင်္ဘောပေါ် ရောက်တာနဲ့ ER ထဲသွားကြည့်ကြပါတယ်။
Maker က NorControl ပါ။ ဟိုတုန်းက အမျိုးအစား။ သုံးထားတာက Digital Governor Unit- DGU 8800e ဆိုတဲ့ Governor Control စံနစ်။ Actuator အမျိုးအစားက electrical servo motor သုံးထားတဲ့ အမျိုးအစားပါ။ သူနဲ့ တွဲပြီး AutoChief 4 Remote Control သုံးထားပါတယ်။ လောလောဆယ်တော့ အလုပ်မလုပ်လို့ Fuel rack linkage ဖြုတ်ပြီး Emergency mode နဲ့ သုံးနေရတယ် ပြောပါတယ်။ 

ဇာတ်ကြောင်းပြန်မေးကြည့်တော့ ဒီပြဿနာက ကြာပါပြီ။ ပထမ servo motor bearing seized ဖြစ်နေခဲ့ပါသတဲ့။ နောက် အဖွဲ့တစ်ခုက servo motor ကိုဖြုတ်ပြီး Servicing လုပ်ပါတယ်။ ပြန်တပ်ပြီး Normal mode မောင်းတာ ဒီပြဿနာ တက်နေတယ်ပြောပါတယ်။ ရောက်တာနဲ့ System ကို လိုက်ကြည့် Manual စာအုပ်ကို Run through ဖတ်ပြီး အခြေအနေကို နားလည်အောင် လုပ်ပါတယ်။

NorControl ရဲ့ သဘာဝက Hardware အပြင် software (parameter) တွေနဲ့ တော်တော်လေး ကလိလို့ ရပါတယ်။ ဒီတော့ ရှေ့အဆက်ဆက် ဘာတွေလုပ်ထားသလဲ ပြန်စစ်ကြည့်ရပါမယ်။

ပထမ ဒီစနစ်ရဲ့ Over view ကို နည်းနည်းပါးပါး မြင်သာအောင် ပြောပြပါမယ်။ Control အနေနဲ့ ဘာတွေပါလဲဆိုတော့ Governor control အတွက် DGU, Safety အတွက် SSU, Remote control / telegraph အတွက် AutoChief ဆိုပြီး စနစ်တွေရှိပါတယ်။ အဲဒီ စနစ်တွေ ကလည်း အပြန်အလှန် ဆက်သွယ်ထားပါတယ်။ အခု Governor နဲ့ ပတ်သတ်တာဆိုတော့ DGU ကို အဓိကထား စစ်ပါမယ်။ 

DGU8800e control က ECR console ပေါ်မှာ ရှိပါတယ်။ ဒီနေရာမှာ နောက်ဆုံးက e ဆိုတဲ့ စာလုံးက electrical actuator ကို ဆိုလိုပါတယ်။ တစ်ခြား သင်္ဘောတွေမှာတော့ pneumatic/ hydraulic actuator တွေလည်း ရှိပါတယ်။ သူကနေ Actuator လို့ခေါ်တဲ့ servo motor ကို မောင်းပြီး fuel အနည်းအများကို အလုပ်လုပ်စေပါတယ်။ ဒီတော့ Engine အခြေမှာ ရှိတဲ့ servo motor ကိုလည်း သွားကြည့်ပါတယ်။ လက်ရှိ အနေအထားမှာတော့ Servo motor ရဲ့ linkage ကို ဖြုတ်ထားတာတွေ့ရပါတယ်။ နောက်တစ်ခုက အဲဒီ DGU အတွက် control power ရယ်၊ Servomotor အတွက် supply power ရယ်ကို ထုတ်ပေးတာက Digital Servo Unit (DSU) လို့ နံမည်ပေးထားတဲ့ ပုံးတစ်ခုက Main Switchboard Panel တွေရဲ့ နောက်မှာ ရှိပါတယ်။ အဲဒါတွေ လိုက်ကြည့် မှတ်ထားလိုက်ပါတယ်။

ပြီးတော့ DGU control ကနေ စပြီး စစ်ပါတယ်။ ပထမဆုံး DGU အဖုံးဖွင့်ပြီး အထဲက power ခလုတ်ကို ပိတ်ပြီး ပြန်ဖွင့်လိုက်ပါတယ်။ Reset လုပ်လိုက်တာပေါ့။ Initialize လုပ်ပြီး ခဏနေတော့ DGU panel မှာ ဘယ်ဘက် အခြမ်းက rEG UP လို့ ပေါ်လာပြီး ညာဘက်က ELA UP လို့ ပေါ်နေပါတယ်။ ပြောဖို့ ကျန်ခဲ့တာက ဒီ DGU panel မှာ အပိုင်း နှစ်ခု ရှိပါတယ်။ Regulator နဲ့ Actuator ပါ။ Regulator က Engine speed ကို တည်ငြိမ်မှုရအောင် command နဲ့ feedback ကို ကြည့်ပြီး တွက်ထုတ်ပေးတာပါ။ Regulator က ထွက်လာတဲ့ signal ကို ကြည့်ပြီး Actuator Motor ကို တစ်ကယ် မောင်းနှင်ပေးတာက Actuator ဘက်ခြမ်းကပါ။ Panel ကိုလည်း နှစ်ခြမ်းခွဲပြီး ထားပါတယ်။ 

အခု ဘယ်ဘက်ခြမ်းက rEG UP ဆိုတာ Regulator ဘက်က ကောင်းတယ်ပေါ့။ ညာဘက်ခြမ်း ELA UP ဆိုတာက Actuator Control ကောင်းတယ်လို့ ဆိုလိုတာပါ။ နောက်ထပ်စစ်တာက Command နဲ့ တစ်ကယ့် Actuator Position ကို ကြည့်ပါမယ်။ NorControl ရဲ့ သဘာဝအတိုင်း Parameter (Op Code) နံပါတ်နဲ့ တန်ဘိုးတွေကို ဖတ်ကြည့်ရပါတယ်။ Parameter နံပါတ် ဘယ်လောက်က ဘာအဓိပ္ပာယ်ရှိတယ် ဆိုတာ Manual ကြည့်ပြီး သိအောင် လုပ်ရပါတယ်။ 

Actuator ဘက်ခြမ်းက Parameter (2) က command ၊ Parameter (3) က Actuator ရဲ့ တစ်ကယ့် position ၊ Parameter (4) က အဲဒီနှစ်ခု ကွာခြားချက်။ ကြည့်လိုက်တော့ လက်ရှိ Stop အနေအထားမှာ Command က 0 ဖြစ်နေပေမဲ့ တစ်ကယ့် Actuator position မှာ 115 ​လောက် ပြနေပါတယ်။ Parameter (4) မှာလည်း -115 ပြနေပါတာ်။ ဒါနဲ့ ME ဆီ ဆင်းပြီး Actuator ရဲ့ Cam ကို ကြည့်လိုက်တော့ neutral position လောက် မှာ ရှိပါတယ်။ Actuator ရဲ့ position ကို feedback ပေးတာက Servo Motor မှာ တွဲတပ်ထားတဲ့ encoder unit ကပါ။ သူတို့ servo motor ပြန်တပ်တဲ့ အချိန် encoder ကို မချိန်ခဲ့ဘူးနဲ့ တူပါတယ်။ 

​

ကြားဖြတ်ပြောချင်တာက Encoder အကြောင်းပါ။ Encoder နှစ်မျိုး ရှိပါတယ်။ တစ်မျိုးက Absolute Encoder ဖြစ်ပြီး၊ နောက်တစ်မျိုးက Incremental Encoder ပါ။ Absolute Encoder ဆိုတာက မူရင်း ပုံသေနေရာတစ်ခု (reference point) ကနေ ဘယ်လောက် ကွာသွားလဲ ဆိုတာ signal ပြန်ပေးပါတယ်။ Incremental Encoder ကတော့ ပုံသေ reference point နေရာသတ်မှတ်မထား ပါဘူး။ ရောက်တဲ့နေရာကနေ အခြေခံယူပြီး တန်ဘိုး တွက်ပေးတာပါ။ Incremental Encoder တွေက reference point နဲ့ ပြန်ချိန်စရာ မလိုပါဘူး။ ဒီမှာတော့ Absolute Encoder သုံးထားပါတယ်။ ဒီတော့ Reference point ပြန်မချိန်ရင် neutral position မှာ တန်ဘိုး တစ်ခု ပြပြီး မှားနေပါမယ်။

ဒါနဲ့ encoder ကို ကြိုးတွေ မဖြုတ်ပဲ မော်တာနဲ့ တွဲထားတဲ့ အပိုင်း ဖြုတ်ပြီး လက်နဲ့ လှည့်ပေးပါတယ်။ ECR ထဲမှာ တစ်ယောက်က ကြည့်ပေးတော့ Parameter (3) တန်ဘိုးတွေ ပြောင်းလာတယ် ပြောပါတယ်။ အဲဒီတန်ဘိုး 0 နဲ့ အနီးဆုံး ရအောင် လှည့်ပြီး ညှိတာ 0.4 အထိပဲ ရလို့ ထားလိုက်ပါတယ်။

ဒါဆိုရင် စမ်းမောင်းကြည့်တာပေါ့။ နေဦး မမောင်းခင် တခြား parameter တွေ ကြည့်ဦးမှ။ ဒါနဲ့ Manual နောက်ပိုင်းက Check list တစ်ခုမှာ Maker setup လုပ်သွားခဲ့တဲ့ parameter စာရင်းကို ကြည့်ပြီး လိုက်တိုက်ကြည့်တာပေါ့။ ဒါပေမဲ့ ပြဿနာတစ်ခုက Parameter တွေက ပုံမှန် Operator level အတွက် parameter ၁၄ ခု လောက်ပဲ ပေါ်ပါတယ်။ နောက်ပိုင်းက parameter တွေကို ဝင်ဖို့ Service mode ဝင်ရပါမယ်။ အဲဒီ mode ဝင်ဖို့ Pass Code လိုပါတယ်။ Crew တွေ မေးကြည့်တော့လည်း မသိဘူးတဲ့။ ဘယ်လိုလုပ်ရမလဲ။ မတတ်နိုင်ဘူး။ trial & error နည်းနဲ့ ထည့်ပြီး ရှာရတာပေါ့။ IT သမား လေသံနဲ့ ပြောရရင် brute force နည်းနဲ့ hack လုပ်တာပေါ့။ ကံကောင်းတဲ့ အချက်က၊ ရှေးက စက်တွေဆိုတော့ ဘယ်နှစ်ကြိမ် မှားမှား lock ဖြစ်မသွားလို့။ ခုနောက်ပိုင်း security စနစ်တွေမှာ ၃ ကြိမ်မှားရင် lock လုပ်လိုက်တာတွေ ရှိပါတယ်။ နောက်ထပ် ပိုကံကောင်းတာက pass code က 00 ကနေ 50 ထိ အများဆုံး ပေးနိုင်တာဆိုတော့ အများကြီး ကြိုးစားဖို့ မလိုဘူး။ ဒါနဲ့ Pass Code ထည့်တဲ့ Para (99) မှာ တစ်ခုပြီး တစ်ခု ထည့်ကြည့်လိုက်တော့ ၄၀ ကျော်လောက်မှာ အဆင်ပြေသွားပါတယ်။ တစ်ခြား Parameter တန်ဘိုးတွေစစ်ကြည့်တော့ ပြောင်းထားတာ မတွေ့ပါဘူး။ 

ဒီတော့ စက်ချုပ်ကို အကြောင်းကြားလိုက်ပါတယ်။ စမ်းကြည့်လို့ ရပြီလို့။ သူတို့တွေ Fuel rack linkage တွေ ပြန်တပ်ပြီး စမ်းကြပါတယ်။ ကျောက်ချထားတာမို့ ခဏပဲ စမ်းပါတယ်။ နောက် ၂ နာရီလောက် စောင့်ပြီး သင်္ဘော ရွှေ့တော့ တစ်ကယ် မောင်းပြီး စမ်းကြည့်ကြပါတယ်။ စက်နှိုး Dead slow နဲ့ မောင်းကြည့်၊ Ahead / Astern မောင်းကြည့်ကြပါတယ်။ Rpm ကလည်း သုတို့လက်ခံနိုင်တဲ့ Range ထဲမှာရှိနေပါတယ်။ သင်္ဘောကလည်း နီးနီးလေးပဲ ရွှေ့ပြီး Cargo တင်ဖို့ Terminal မှာ ရပ်လိုက်ပြီမို့ နည်းနည်းစမ်းကြည့်ပြီး စက်ချုပ်က လက်ခံလိုက်ပါတယ်။  

အမှန်ကတော့ ဒီလို Servo motor မျိုးကို Service လုပ်ပြီး ပြန်သုံးတာ သိပ်မကောင်းပါဘူး။ Maker တွေ ချိန်ညှိထားတဲ့ parameter တွေနဲ့ မကိုက်ညီတာတွေ ဖြစ်နိုင်ပါတယ်။ နောက် ၂ လလောက် အကြာ ပြဿနာတက်လို့ သွားတက်ကြည့်တော့ Servo motor တစ်ကယ် အလုပ်မလုပ်တော့တာ တွေ့ရတာနဲ့ servo motor အသစ် လဲဖို့ အကြံပေးခဲ့ရပါတယ်။

ဝင်း​အောင် (ပခုက္ကူ)

၂၂-၂-၂၀၂၀ 

Boiler (6-b) - Muira Z Feed Water Auto mode not working

ဟိုနေ့က ပြဿနာရဲ့ အဆက်လေး ပြန်လာပါပြီ။ ဒီတစ်ခါ Auto Fire တော့ရပြီ။ Auto Feed Water မရသေးဘူး။ ရေကို Manual နဲ့ မောင်းနေရတယ်။ ဓာတ်ကြိုးညီလေး ပြောပြတာက အရင် PLC အသစ် လဲပြီးစ စမ်းတုန်းက Pump 2 မှာ Stand by မီးလင်းသေးတယ် ပြောပါတယ်။ အခုတော့ Auto Mode မှာ Standby မီးလည်း မလင်း Run လည်း မလာပါဘူး။ ရေ level ကို လျှော့ ချခိုင်းကြည့်တော့ Low Level Alarm နဲ့ Low Low Level Alarm လာပြီး Boiler shut down ဖြစ်သွားပါတယ်။ Safety အပိုင်းကလည်း အလုပ်လုပ်တယ်ဆိုတဲ့ သဘောပေါ့။ ဒါပေမဲ့ Feed water pump ကတော့ အလုပ်မလုပ်ပါဘူး။

ဒီ boiler ရဲ့ ရေ level နဲ့ ပတ်သတ်တဲ့ စနစ်လေး မြင်သာအောင် ပြောပြချင်ပါတယ်။ ရေ level တိုင်းတဲ့ စနစ် နှစ်ခု ရှိပါတယ်။ တစ်ခုက Differential pressure transmitter သုံးပြီး Tank ထဲက တစ်ကယ့် ရေ level ကို တိုင်းပါတယ်။ ပြီးရင် ECR ထဲက Display unit မှာ Level ပြပေးပါတယ်။ သူက Display သက်သက်ပါ။ Control အပိုင်း ဘာမှ မလုပ်ပါဘူး။ 

နောက်တစ်ခုက Boiler ဘေး တစ်ဘက်စီမှာ ရှိတဲ့ sight glass tube နှစ်ခုမှာ တပ်ထားတဲ့ level probe နှစ်ခုပါ။ Probe တစ်ခုမှာ အနိမ့်အမြင့် မတူတဲ့ သတ္တုချောင်း ၅ ချောင်းစီ ရှိပါတယ်။ အဲဒီ probe နှစ်ခုရဲ့ sensing signal တွေကို level တစ်ခုစီအတွက် series ဆက်ပြီး Level controller LM1-200 ဆီပို့ပေးပါတယ်။ LM1-200 ကနေ PLC ဆီ input signal ပြန်ပေးထားတာပါ။

ဒီတော့ ဖြစ်နိုင်ချေ ၃ ခု ရှိပါတယ်။ Probe မကောင်းတာလား၊ LM1-200 controller မကောင်းတာလား၊ PLC program ကြောင့်လား တစ်ခုခုပါ။ ရေ ဖေါက်ချတဲ့အချိန် L/LL alarm လာတဲ့အတွက် probe နဲ့ controller ကတော့ အတိုင်းအတာ တစ်ခုအထိ ကောင်းပါလိမ့်မယ်။ 

အဲဒီအချိန်မှာ ကျွန်တော် ခရီးတစ်ခု သွားရမှာမို့ ထားခဲ့ရပါတယ်။ ကျန်တဲ့ညီလေးတွေကို ဆက်စစ်ဖို့မှာခဲ့ပါတယ်။ အဆိုးဆုံး အခြေအနေမှာ relay logic နဲ့ အပြင်က Modify လုပ်ရင် လုပ်လို့ရအောင် circuit လေး ဆွဲပေးခဲ့ပါတယ်။

နောက် နှစ်ရက်လောက် အကြာ ကျွန်တော် ပြန်လာတော့ အခြေအနေ မထူးသေးပါဘူး။ Modified Circuit တွေလည်း မလုပ်ထားသေးပါဘူး။ ဒါနဲ့ ပထမဆုံး PLC program ကို အရင် စစ်ကြည့်ပါတယ်။ Simulation input တွေ ပေးကြည့်ပြီး စမ်းပါတယ်။ အဲဒီမှာ PLC ladder diagram ထဲက Pump 2 အတွက် Control တစ်ခုမှာ coil (actuator) က normally inactive -(  )- မဟုတ်ပဲ၊ normally active -(/)- ဖြစ်နေတာ တွေ့ရပါတယ်။ အဲဒီအမှားကို ပြင်လိုက်ပေမဲ့ မရသေးပါဘူး။ အဲဒီ program ထဲမှာ သုံးထားတဲ့ shift register ရဲ့ function ကို နားမလည်လို့ ပြန်ဖတ်ရပါတယ်။ ထူးထူးဆန်းဆန်း ဒီနည်းနဲ့ Control လုပ်ထားတဲ့ program မို့ ပြန်ဖေါက်သည်ချပါဦးမယ်။ (PLC program မတတ်သေးတဲ့သူတွေလည်း သည်းခံဖတ်ကြည့်ပါ။)

အဲဒီ Shift Register ရဲ့ အလုပ်လုပ်ပုံက Store input က ဝင်တဲ့ Data တွေကို Buffer memory ထဲမှာ သိမ်းထားပါတယ်။ ပြီးမှ Retrieve လုပ်ရင် First In First Out (FIFO) ဒါမှမဟုတ် Last In First Out (LIFO) အစီအစဉ်အရ တစ်ခုစီ ပြန်ထုတ်ပေးပါတယ်။ နောက်.. buffet empty နဲ့ buffer full ပြတဲ့ flag out put နှစ်ခု ရှိပါတယ်။ 

အခု ဒီ pump control မှာတော့ interlock signal တွေ ဖြစ်တဲ့ (pump 1 အတွက်ဆိုရင် pump 2 ရဲ့ run signal ၊ pump1 overload signal ၊ water high level) အစရှိတဲ့ signal တွေကို parallel ဆက်ပြီး Store input အနေနဲ့ ထည့်ပေးပါတယ်။ Start button က signal ကိုတော့ Retrieve input မှာ ထည့်ထားတယ်။ Empty Buffer output ကိုတော့ pump ready coil မှာ ထုတ်ပေးထားပါတယ်။ ဒီတော့ buffer ထဲမှာ interlock signal memory မရှိတော့မှ ready signal ရမှာပါ။ 

ရှေ့မှာ interlock signal က တစ်ခုပဲရှိရင်တော့ Pump start button တစ်ချက်နှိပ်လိုက်တာနဲ့ pump run (သို့) stand by မီး လင်းတာပေါ့။ interlock signal တွေ တစ်ခုမက memory ထဲရောက်နေရင်တော့ မကုန်မချင်း start button ကို အကြိမ်ကြိမ်နှိပ်ပြီး Retrieve လုပ်ပေးနေရမှာပါ။ Buffer မှာ ကုန်သွားမှ Standby မီးလင်းလာမှာပါ။ ဘာလို့ ဒီလို logic နဲ့ ရေးထားတယ် ဆိုတာတော့ မသိပါဘူး။ simulation စမ်းကြည့်ပါတယ်။ ဒါဆိုရင် PLC program အပိုင်းက အဆင်ပြေပြီလို့ ပြောနိုင်ပါတယ်။

တစ်ခါ level probe နဲ့ LM1-200 က output တွေကို စမ်းပါတယ်။ ရေဖေါက်ချ၊ ပြန်ဖြည့်ပြီး ပြောင်းသွားတဲ့ signal တွေကို ကြည့်ပါတယ်။ ( Sight glass tube ကိုပဲ valve ဖွင့်၊ ပိတ်လုပ်ပေးတာမို့ လွယ်ပါတယ်။) L , LL signal တွေ ပုံမှန် အလုပ်လုပ်ပေမဲ့ High level အတွက် ဘာ signal မှ မလာပါဘူး။ ပြန်ကြည့်တော့ High level signal က LM1-200 ဆီမသွားပဲ 61-FGP-NT ဆိုတဲ့ နောက်ထပ် level controller လေးနဲ့ သုံးထားပါတယ်။ အဲဒီ controller မကောင်းတာလား Probe က high level မှာ မရောက်တာလား သေချာအောင် Probe signal ကို short လုပ်ပြီးပေးတော့ high level output ထွက်ပါတယ်။ Airlock ဖြစ်လို့လား ဆိုပြီး sight glass tube ကို drain down လုပ်၊ ရေဖြည့်။ Manual pump မောင်းပြီး ရေ level မြင့်တာသေချာလုပ်လည်း မရပါဘူး။ Level Probe ဒုက္ခပေးတာပါ။ 

လက်ရှိအတိုင်း စမ်းကြည့်တော့ Auto feed water pump တွေ အလုပ်လုပ်သွားပါပြီ။ Low level ရောက်ရင် Cut in ဝင်ပြီး လည်ပါတယ်။ ပြဿနာက High level ရောက်ရင် ဖြတ်မချနိုင်ပါဘူး။ Internal timer ၃ မိနစ်ရောက်ရင်တော့ ဖြတ်မှာပါ။ 

Super နဲ့ စက်ချုပ်ကို ခေါ်ပြပြီး probe အသစ်မှာဖို့ ပြောတော့ Super က Probe မလဲပဲ တစ်ခြားနည်းနဲ့ high level ဖြတ်နိုင်အောင် လုပ်ပေးပါပြောပါတယ်။ ဒါနဲ့ နောက်တစ်နည်း ECR သွားတဲ့ Level display circuit ရဲ့ 4-20 mA signal ကို PR controller 4116 တစ်ခုသုံးပြီး အစားထိုး ပေးလိုက်ပါတယ်။ အားလုံး ပြေလည်သွားတယ်လို့ ပြောပါတော့။

တစ်ကယ်တမ်း surveyor ပြတဲ့အချိန် ချွေးပြန်စရာ ပြဿနာတွေ ကြုံရပါသေးတယ်။ တစ်ခုက booster pump pressure မငြိမ်တာ။ နောက် Flame Eye relay က flicker ဖြစ်နေတာ။ မရိုးရအောင်ပါ။ ဓာတ်ကြိုးလေးနဲ့ crew တွေဝိုင်းကူပြီး surveyor ပြလို့ရအောင် မနည်း လုပ်ခဲ့လိုက်ရပါတယ်။ 

​ Booster pump ကတော့  filter လဲ၊ service လုပ်ဖို့ လိုပါမယ်။ Flame eye က မီးရောင် အဝါတောက်တောက်ဆိုရင် အဆင်ပြေတယ်။ မီးရောင် ကစားရင် output မငြိမ်ပါဘူး။ အရမ်း sensitive ဖြစ်နေပါတယ်။

နောက်ပြန်မေးကြည့်တော့ ရှေ့က Technician က Original sensor မရလို့ ရတဲ့ LDR sensor တစ်ခုကို အဟောင်း sensor body မှာ လဲထည့်ထားတယ် ဆိုပါတယ်။ သူ့ spec အရ Cadmium Sulphide (CdS) sensor သုံးရမှာဖြစ်ပြီး၊ 12k ohm မှာ Off ၊ 10k ohm အောက်ဆို On ပါတယ်။ ထည့်ထားတဲ့ LDR နဲ့ သေချာ match မဖြစ်တာ ဖြစ်နိုင်ပါတယ်။ စင်္ကာပူမှာ Maker ဆီက original sensor မှာပြီး ပို့ပေးဖို့ စီစဉ်ခဲ့ပါတယ်။ 

ရှေ့တစ်ပိုင်းအပြီး မိတ်ဆွေတချို့ မေးကြတာက PLC program ဘယ်လို ဝင်ပြင်လဲ၊ ဘာ software သုံးလဲ၊ Password lock လုပ်မထားဘူးလား ဆိုတာတွေပါ။

ပုံမှန်အားဖြင့် Maker ရေးတဲ့ program တွေဆိုရင် ကျွန်တော် ဝင်မပြင်ပါဘူး။ ဝင်လို့မရအောင်လည်း password နဲ့ lock လုပ်ထားလေ့ရှိပါတယ်။ အခုဟာက ကျွန်တော်ကူပေးရတဲ့ ကုမ္ပဏီက တစ်ယောက် ရေးထားတာမို့ သံသယဖြစ်လို့ ဝင်ကြည့်တာပါ။ သူက lock လုပ်မထားပါဘူး။ လိုအပ်ရင် သူ့ဆီက password လှမ်း တောင်းလို့ရပါတယ်။

PLC ကို connect လုပ်ဖို့ သုံးတဲ့ PLC နဲ့ match ဖြစ်တဲ့ အထူး software သုံးရသလို သူ support လုပ်တဲ့ အထူးကြိုး သုံးရပါတယ်။ အခု PLC က Schneider M221 ဆိုတော့ EcoStruxure software နဲ့ Schneider ရဲ့ Micro USB cable သုံးပြီး ချိတ်ဆက်ပါတယ်။ ကြိုးနဲ့ software က အဲဒီ ကုမ္ပဏီက အလွယ်တကူ ရလို့ အဆင်ပြေသွားတာပါ။

ဝင်းအောင် (ပခုက္ကူ)

၁၆-၂-၂၀၂၀

Boiler (6-a) - Muira Z VW-k type Cannot run in Auto Mode

ဒီတစ်ခေါက် Batam မှာ တွေ့ခဲ့ရတာကတော့ ကိုညီညီရဲ​့ ဘေဘီလေး ဖြစ်တဲ့ Muira boiler အမျိုးအစား ပါ။ Type နည်းနည်း ကွာပါတယ်။ အကြမ်းဖျင်း တူတယ်လို့ ပြောနိုင်ပါတယ်။ ပြဿနာက Auto Mode နဲ့ run လို့ မရဘူး ပြောပါတယ်။

သင်္ဘော ပေါ်မှာ သူကြီး၊ စက် ၂ နဲ့ ဓာတ်ကြိုးက ရွှေတွေပါ။ ဓာတ်ကြိုးလေးက ကိုယ့်စာဖတ် ပရိတ်သတ် တစ်ယောက်၊ fb friend ဖြစ်နေပါတယ်။ အကူအညီ အများကြီး ရပါတယ်။ Online မှာပဲ မိတ်ဆွေဖြစ်ပြီး အပြင်မှာ မဆုံဖူးသေးတဲ့သူတွေ ဒီဇင်ဘာ ရန်ကုန်ပြန်တုန်းကလည်း တော်တော်လေး ဆုံဖြစ်တယ်။ စိတ်ချမ်းသာမိပါတယ်။ အခုလည်း ဒီမှာ ဆုံရပြန်ပြီ။

ထားပါတော့။ ပြဿနာကို မေးကြည့်တော့ ဒီ boiler က တစ်လျောက်လုံး Manual နဲ့ မောင်းလာခဲ့တာ ဆိုပါတယ်။ အခု Dock ဝင်တော့ Auto Mode နဲ့ မောင်းနိုင်အောင် လုပ်ပါတယ်။ ကျွန်တော် မလာခင် ဘာတွေ လုပ်ထားလဲ မေးကြည့်တော့ ကျွန်တော့ကို လာကူဖို့ ခေါ်တဲ့ ကုမ္ပဏီရဲ့ အင်ဒို Technician တစ်ယောက်က လုပ်ခဲ့တာတွေကို ကျွန်တော်က ဆက်ရှင်းပေးရမှာပါ။ သူက ခွင့်ပြန်သွားတယ်လို့ ဆိုပါတယ်။ သူဘာတွေ လုပ်ခဲ့လဲ ဆိုတော့ PLC မကောင်းလို​့ PLC လဲထားတယ်တဲ့။ Flame eye relay နဲ့ sensor လဲထားတယ်။ Magnetic Contactor တချို့ လဲထားတယ် ဆိုပါတယ်။ ကျွန်တော် ရောက်တဲ့နေ့က water level indicator အတွက် Differential Pressure Transmitter လဲတာ တွေ့ပါတယ်။

ပထမ Manual mode နဲ့ မောင်းကြည့်ခိုင်းပါတယ်။ မီးချက်ချင်း မတောက်လို့ နှစ်ခါ သုံးခါ ကြိုးစားကြည့်​မှ မီးတောက် သွားပါတယ်။ နောက် Auto mode မောင်းတော့ Fan တွေလည်၊ ဆီ pump တွေကိုလည်ပြီး မီးမတောက်ပါဘူး။ ဒုတိယတစ်ခါ ထပ်စမ်းတော့ မီးတောက်ပါတယ်။ ဒါပေမဲ့ ၅ စက္ကန့်လောက် နေတော့ ပြန်ငြိမ်း သွားပါတယ်။ ၂ ခါ လောက် စမ်းကြည့်တော့လည်း အတူတူ ပါပဲ။

ပထမ system ကို ရင်းနှီးအောင် လိုက်ကြည့်ပါတယ်။ ဘွိုင်လာရဲ့ နောက်ဘက်တစ်နေရာမှာ Pilot pump နဲ့ booster pump တွေ တွေ့ပါတယ်။ ဒါတွေက ဆီ pressure ရအောင် မောင်းပေးတဲ့ pump တွေပေါ့။

အမိုးပေါ်တက်ကြည့်ပါတယ်။ ဒီနေရာမှာ ကိုညီညီ ရေးခဲ့တဲ့ Note ထဲက ဆီပိုက်တွေ အသွားအလာနဲ့ solenoid တွေကို လိုက်ကြည့်ပါတယ်။ FO heater ကနေထွက်လာတဲ့ ပိုက်၊ heater အတွက် Thermostat တွေနဲ့ Temp Controller တစ်ခု၊ pilot DO line နဲ့ အဲဒီပေါ်က Solenoid တွေ၊ Ignition transformer နဲ့ Electrode ဆီ ဝင်သွားတဲ့ ကြိုး ၂ ချောင်း၊ Flame Eye detector ၊ FD fan နဲ့ Damper motor အဲဒါတွေ တွေ့ပါတယ်။

ပြီးတာနဲ့ အောက်ထပ် ပြန်ဆင်းပြီး control panel ကို ဖွင့်ကြည့်ပါတယ်။ Schneider PLC အသစ်တစ်ခု တွေ့ပါတယ်။ နောက်၊ flame eye relay ၊ level controller ၊ timer ၊ relay (MC) နဲ့ တွေ့နေကျ တစ်ခြား Panel component တွေ တွေ့ပါတယ်။

ကြည့်စရာရှိတာ လိုက်ကြည့်ပြီးပြီဆိုတော့ စဉ်းစားစရာတွေ စဉ်းစားပါမယ်။ ပထမ Manual နဲ့ မီးတောက်တယ်။ ဆိုတော့ Nozzle, fuel line, pilot, ignition transformer, electrode, solenoid တွေ ကောင်းတယ်လို့ ယူဆနိုင်ပါတယ်။ Combustion Indicator လေးက လင်းနေတယ်ဆိုတော့ Flame eye detector နဲ့ relay က ကောင်းတယ်ပေါ့။ ဒါဆို စစ်စရာတောင် တော်တော်လေး ကုန်သွားပြီ။

ဒီတော့ Manual operation နဲ့ Auto operation ဘာကွာလဲ ယှဉ်ကြည့်ရပါတော့မယ်။ Drawing မှာ ဖတ်ကြည့်ပါတယ်။ Drawing က စာလုံး သေးပြီး တချို့နေရာတွေ မထင်မရှားဖြစ်နေတော့ နည်းနည်း ဖြတ်လမ်း လိုက်ကြည့်ပါတယ်။ ပထမ Manual operation လုပ်ခိုင်းလိုက်ပါတယ်။ Manual operation လုပ်တော့ FD fan ဖွင့်ပြီး Pre-purging run ပါတယ်။ ပြီးတော့ ဆီ pump run ပါတယ်။ ပြီးတာနဲ့ Pilot burner push button နဲ့ Main solenoid selector switch နှစ်ခု တစ်ပြိုင်ထဲ On လိုက်ပါတယ်။ အဲဒီ အချိန်မှာ ဘယ် MC တွေ ကပ်သွားလဲ ဆိုတာ လိုက်ကြည့်ပါတယ်။ IGX, 20VX နဲ့ 20DX ဆိုတဲ့ MC ၃ လုံး ဆွဲသွားပါတယ်။ ခဏနေတော့ 20DX က ပြန်ကွာ သွားပါတယ်။ ကျန်တဲ့ IGX နဲ့ 20VX က အမြဲကပ်နေပါတော့တယ်။ ဓာတ်ကြိုးလေး ပြောပြချက်နဲ့ ကျွန်တော်ယူဆလိုက်တာက IGX ဆိုတာ Ignition transformer ၊ 20VX က Main Solenoid Valve ၊ 20DX က Damper motor ပေါ့။ (နောက် ပြန်ဖတ်ကြည့်တော့ အတိအကျ မမှန်ပါဘူး။)

ပုံမှန် boiler မောင်းတဲ့ sequence အရ Ignition နဲ့ Pilot pump / solenoid ဖွင့်ပါမယ်။ Damper အကျဉ်းဆုံး ပိတ်ပေးပါမယ်။ ပြီးရင် Main burner fuel valve ဖွင့်ပါမယ်။ မီးတောက်ပြီးရင် Ignition နဲ့ Pilot pump / valve ပိတ်ရပါမယ်။ Damper ​အကျယ်ဆုံး ပြန်ဖွင့်ပေးပါမယ်။ 

အခု Manual မောင်းတော့ Pilot burner နဲ့ Main fuel valve ကို တစ်ပြိုင်နက်ထဲ ဖွင့်တာ တွေ့ရပါတယ်။ နောက် drawing ပြန်ဖတ်ကြည့်တော့မှ ပို ရှင်း သွားတယ်။ Pilot burner push button နှိပ်လိုက်တဲ့ အချိန်မှာ Pilot pump ရယ်၊ Pilot Solenoid ရယ်၊ damper motor ရယ်၊ Ignition Transformer ရယ် On ပါမယ်။ Pilot ခလုတ်လွှတ်တာနဲ့ pilot pump က ချက်ချင်းရပ်သွားမှာပါ။ Damper လည်း ပြန်ပွင့်ပါမယ်။ IGX နဲ့ 20VX က တောက်လျောက် ကပ်နေပါတယ်။ ဒါပေမဲ့ Timer နဲ့ Ignition Transformer နဲ့ Pilot Solenoid ကို ပြန်ဖြတ်ပါတယ်။

Auto Mode မှာတော့ PLC က output တစ်ခုစီနဲ့ထိန်းပါတယ်။ Auto mode run ကြည့်တဲ့ အချိန် စက္ကန့်ပိုင်းပဲ ခြားပြီး IGX, 20VX နဲ့ 20DX တွေ ဆွဲသွားပါတယ်။ မီးတောက် ပါတယ်။ Flame Eye relay ဆွဲသလို combustion indicator လည်းပြပါတယ်။ ခဏနေတော့ relay တွေ အကုန် ပြန်ပြီး Off ဖြစ်သွားတယ်။ မီးလည်း ငြိမ်းသွားတယ်။ Flame Eye failure alarm တော့ မလာပါဘူး။ 

ဖြစ်နိုင်ချေတွေ စဉ်းစားကြည့်ပါတယ်။ Flame eye sensor က ဖြတ်ချလို့လား၊ ဆီ valve ပိတ်လိုက်လို့လား၊ damper ဖွင့်လိုက်လို့ ဆီ/ လေ အချိုး မညီပဲ မီးငြိမ်းသွားတာလား။ အဲဒီအထဲမှာ Flame eye relay ဆွဲနေတာတွေ့ရတဲ့အတွက် Flame Eye က မဖြစ်နိုင်ဘူး။

Boiler အမိုးပေါ်တက်ကြည့်ပြီး ပြန် run ခိုင်းလိုက်ပါတယ်။ စပြီး ခဏအကြာ မီးတောက်လာပါတယ်။ Damper က အကျဉ်းဆုံး အနေအထားမှာပါ။ မီးအားကောင်းပြီး ငြိမ်ပါတယ်။ ၅ စက္ကန့်လောက် အကြာ ရုတ်တရက် မီးငြိမ်းသွားပြီး damper ပြန်ပွင့်သွားပါတယ်။ မီးငြိမ်းပြီးမှ damper ပွင့်တာဆိုတော့ damper ကြောင့် မဖြစ်နိုင်သလို၊ ဆီ/လေ အချိုးကြောင့်လည်း မဟုတ်ဘူးလို့ ယူဆပါတယ်။ ဒါဆို ဘာလို့ ဖြတ်ချတာလဲ။

တစ်ခုစဉ်းစားမိတာက PLC နဲ့ Program က အသစ်ရေးထားတာ။ ​ေရးတဲ့သူက လက်တွေ့ စမ်းသပ် မကြည့်ရသေးဘူးဆိုတော့ program အပေါ်လည်း သံသယဖြစ်မိပါတယ်။ သူ simulation လုပ်ထားတာ အကုန်ကောင်းတယ် ပြောပါတယ်။ မူရင်း Omron PLC ရဲ့ program ကို မှီးပြီး သူကျွမ်းကျင်တဲ့ Schneider PLC နဲ့ ပြန်ရေးထားတာပါ။ 

နောက်နေ့ ကွန်ပျူတာယူလာပြီး PLC နဲ့ ချိတ် စစ်ပါတယ်။ Auto run တဲ့ အချိန် monitor လုပ်ကြည့်ပါတယ်။ ဘယ်အချိန်မှာ ဘာ signal တွေ ထွက်သလဲဆိုတာ စစ်ကြည့်ကါတယ်။ အထူးသဖြင့် Main Fuel Valve အဝင် နေရာ logic တွေပါ။ ရှာရင်းဖွေရင်း၊ စစ်ကြည့်ရင်းနဲ့ နောက်ဆုံးတော့ PLC internal timer တစ်ခုက ဖြတ်ချနေတာ တွေ့ရပါတယ်။ Timer type ကို TP (pulse timer) အစား TOn (On timer) နဲ့ ပြောင်းလိုက်ပြီး စမ်းတော့ အဆင်ပြေသွားပါတယ်။ စမ်းကြည့်တော့ မီးတောက်တယ်။ ပြန်ဖြတ်မချတော့ပါဘူး။ ဒါပေမဲ့ Pre-purge timer ကိုလည်း သိပ်မကြိုက်ပါဘူး။ ပြင်ဖို့ ကြိုးစားပေမဲ့ အပြင်ဘက်က Analog timer တွေနဲ့ ညိနေလို့ အဆင်မပြေပါဘူး။ အချိန်သိပ်မရလို့ ဒီတိုင်းပဲ ထားခဲ့ပါတယ်။ မီးတောက်ဖို့ အရင် ဦးစားပေး လုပ်လိုက်ရတာပါ။ 

Super ကို စမ်းပြလိုက်ပါတယ်။ အဆင်ပြေပါတယ်။ ဒါပေမဲ့ Feed water ကိုလည်း Auto ရချင်တယ်လို့ ပြောပါတယ်။ အဲဒီအကြောင်းကို နောက် ဆက်ရေးပေးပါမယ်။ 

( Commercial Break လေးပြီးရင် ပြန်လာခဲ့ပါမယ် 😊)

ဝင်းအောင် (ပခုက္ကူ)

၁၃-၂-၂၀၂၀