Steering Gear (5) - Rudder Indicators Not Match

Bunker Barge လေး တစ်စီးမှာ rudder angle indicator ပြဿနာ သွားရှင်းပေးခဲ့ရပါတယ်။ Super ပြောပြတာကတော့ မကြာသေးခင်က Synchro Motor (Transmitter) အသစ် လဲထားတယ် ပြောပါတယ်။  သင်္ဘောပေါ်ရောက်တော့ စက်ချုပ်က ပြောပြပါတယ်။ Synchro motor လဲပြီးတော့ တစ်ကယ့် Rudder position ရယ်၊ Steering Gear Room ထဲမှာ ရှိတဲ့ Local indicator ရယ်၊ Bridge မျက်နှာကျက်က indicator အဝိုင်းကြီးရယ်က မှန်တယ်တဲ့။ Wing တစ်ဘက် တစ်ချက်က indicator နှစ်ခုရယ်၊ ECR ထဲက indicator ရယ်က မမှန်ဘူး ပြောပါတယ်။ 

လက်ရှိအနေအထားကို စမ်းကြည့်ဖို့ လုပ်ပါတယ်။ ကျွန်တော် စာရွက်အလွတ်မှာ ဇယားလေး ချဆွဲလိုက်ပါတယ်။ ရှေ့ဆုံး Column က Command ပေါ့။ နောက် Column ၃ ခုမှာ Center ရယ်၊ Wing (P) ရယ်၊ Wing (S) ရယ် ထားလိုက်တယ်။ Steering Handle က ပေးတဲ့ Command နဲ့ indicator တွေမှာ ပြတဲ့ တန်ဘိုး တွေ တန်းစီ ရေးလိုက်ပါတယ်။

သူတို့ပြောသလို Bridge Center က indicator ကတော့ တော်တော်နီးစပ်အောင် မှန်ပါတယ်။ ဒါတောင် ဘေးအစွန်မှာ 5 degree လောက် ကွာတယ်။ Wing မှာ ရှိတဲ့ indicator နှစ်ခုကတော့ အများကြီး လွဲပါတယ်။ 

Command   Center   Wing(P)   Wing(S)

     P30               P35        S7            S8

     P20               P24        S19          S20

     P10                P12        S31          S31

        0                 0.        [down]    [down]

     S10                S11         P36         P35

     S20               S23         P24         P24            

     S30               S34         P13         P13

ဂဏန်းတွေချည်းကြည့်ရင် အဓိပ္ပာယ် မသိသာပါဘူး။ Indicator dial ခွက်ကို ကြည့်တော့ တစ်ကယ် ဖြစ်သင့်တဲ့ Position နဲ့ 180 degree ဆန့်ကျင်ဘက်မှာ ပြနေတဲ့ သဘောပါ။

အရင်လည်း ပြောဖူးပါတယ်။ အခု နည်းနည်း ထပ်ပြောပြ​ပါမယ်။ Synchro motor type feedback စနစ်အကြောင်းပါ။ ဒီ feedback စနစ်မှာ 3 phase motor ရဲ့ phase alignment ကို အသုံးချထားပါတယ်။ Transmitter (Tx) တစ်ခုနဲ့ receiver (Rx) တွေကို ကြိုး ၅ ချောင်းစီ အပြိုင် ဆက်ထားပါတယ်။ ၂ ချောင်းက Rotor winding ကို 220 or 110V AC supply ပေးထားပါတယ်။ ကျန်တဲ့ ၃ ချောင်းက 3 phase Stator winding အတွက် ဆက်ထားပါတယ်။ Transmitter ဘက်က Rotor angle ပြောင်းတဲ့အပေါ် မူတည်ပြီး Stator ကြိုး ၃ ချောင်းက phase angle ပြောင်းသွားတော့ Receiver ဘက်က Rotor က လိုက်လည်တဲ့ အချက်ကို သုံးထားတာပါ။

ပထမ Drawing တွေ ရှာကြည့်တော့ Pump နဲ့ Steering Gear control အပိုင်း အသေးစိတ်တွေ့ပေမဲ့ Rudder Angle indicator အပိုင်းက 1 line drawing လေး တစ်ခုပဲ တွေ့ပါတယ်။ အဲဒီ drawing အရ SG room ထဲက Transmitter ကနေ ကြိုး ၅ ချောင်းလာတယ်။ အဲဒီ Upper deck က Fuse Box တစ်ခုထဲ ဝင်သွားတယ်။ အဲဒီကနေ indicator ၅ နေရာကို ကြိုး ၅ ချောင်းစီ  ပြန်ခွဲထွက်တယ်တဲ့။ ဒါလောက် သိရရင် အဆင်ပြေပါပြီ။

အဲဒီ Fuse box ကို အရင်ရှာကြည့်တော့ Cable Trunk အခန်းလေးထဲမှာ တွေ့ပါတယ်။ အောက်ဘက် တစ်တန်းမှာ ကြိုး ၂ ချောင်း စီ Parallel ဆက်ထားတာတွေ့ပါတယ်။ Fuse တွေလည်း တန်းစီ တပ်ထားတယ်။ Fuse တွေ အကုန်ကောင်းမယ်လို့ ယူဆပါတယ်။ တိုင်းကြည့်တော့ AC 220V ရှိပါတယ်။ အပေါ် တစ်တန်းမှာတော့ ကြိုး ၃ ချောင်းစီ looping လုပ်ဆက်ထားတာ တွေ့ရပါတယ်။ 

ပထမဆုံး ပြဿနာကို အရင် စဉ်းစားကြည့်ရအောင်။ ဒီပြဿနာက Transmitters Synchro motor လဲပြီးတော့ ဖြစ်တာဆိုတော့ အဲဒီအချိန်မှာ ဘယ်လို ကြိုးတွေ ရွှေ့ပြောင်းညှိထားတယ် မသိဘူး။ Transmitter နဲ့ Local ရယ် Bridge Center indicator တွေက ညီတယ်ဆိုတော့ မထိပဲထားလိုက်ပြီး ကျန်တဲ့ ၃ ခုကို လိုက်ချိန်မယ် စဉ်းစားပါတယ်။ နောက်တစ်ခုက မမှန်တဲ့ indicator တွေရဲ့ position က ၁၈၀ ဒီဂရီ လွဲနေတယ်ဆိုတော့ 3 phase ကြိုးတွေရဲ့ Sequence ပြောင်းကြည့်ရင် ရနိုင်မလား။ ကြိုးစားကြည့်တာပေါ့။ 

Wing (P) နဲ့ Wing (S) indicator တွေကို အရင်စပြီး ​ြေပာင်းကြည့်ပါတယ်။ ဥပမာ R-S-T ကို S-T-R လို့ ပြောင်းတာပေါ့။ သုံးချောင်းလုံး အစဉ်လိုက် ပြောင်းပါတယ်။ ၂ ချောင်းထဲ ပြောင်းမိရင် လက်ဝဲရစ်၊ လက်ယာရစ် rotation ပြောင်းပြန် လည်သွားမှာမို့ပါ။ အဲလိုပြောင်းဖို့ ကြိုး ဖြုတ်တဲ့အချိန် Resistance တိုင်းကြည့်တော့ 3 phase က တူပါတယ်။ 70 ohm ဝန်းကျင်လောက် ရှိပါတယ်။

ပြောင်းပြီးတဲ့အချိန် Bridge မှာ တက်ပြီး စမ်းကြည့်ပါတယ်။ Command 0 position မှာ Wing နှစ်ခုက P15 လောက် ပြပါတယ်။ Steering ရွှေ့ကြည့်တော့ အလိုက်သင့် Port 15 degree လောက် offset ဖြစ်နေပါတယ်။

ဒါနဲ့ နောက်တစ်ခေါက် ကြိုးတွေ အစဉ်လိုက် တစ်ကြိမ်ထပ်ရွှေ့ပါတယ်။ အပေါ်က ဥပမာအရ ကြိုး sequence ကို T-R-S လို့ ပြောင်းလိုက်တာပေါ့။ ဒီတစ်ခါ ထပ်စမ်းတော့ Stbd 15 degree လောက် offset ဖြစ်နေပြန်ပါတယ်။ 

ဒါဆိုရင်တော့ ကြိုး sequence ပြောင်းရုံနဲ့ မရနိုင်တော့ပါဘူး။ indicator အဖုံးဖွင့်ပြီး Pointer တွေ ဖြုတ်ညှိဖို့ လိုပါပြီ။ ဒါနဲ့ indicator တွေကို တက်ကြည့်ပါတယ်။ အခြေအနေ မကောင်းပါဘူး။ အပြင်ဘက်မှာဆိုတော​့ မိုးဒဏ်၊ လေဒဏ်နဲ​့ Screw တွေ သံချေးတက်ပြီး ဆွေးနေပါတယ်။ ကြိုးစားဖြုတ်ကြည့်တော့ တစ်လုံးပဲပြုတ်ပါတယ်။ ကျန်တာတွေ ဖြုတ်မရတော့ပါဘူး။ ဒါဆိုရင် ဒီ unit တွေကို ညှိဖို့ လမ်းပျောက်သွားပါပြီ။ 

ပြဿနာတော့ အကြီးအကျယ် တက်ပြီပေါ့။ Screw ကို ရတဲ့နည်းနဲ့ ဖျက်ပြီးဖွင့်ရင် ရေလုံအောင် ပြန်ပိတ်ဖို့ မလွယ်။ ဘာလုပ်ရမလဲ။ စက်ချုပ်နဲ့ Super ကို အခြေအနေ သတင်းပို့ပါတယ်။ 

ပြီးတော့ Feedback transmitter unit, Local indicator နဲ​့ Bridge center unit တွေကို အဖုံးဖွင့်ကြည့်ပါတယ်။ သူတို့ သဘောတူရင် ဒီ unit တွေကနေ ပြန်ညှိဖို့ ပြောကြည့်ပါတယ်။ သူတို့ကတော့ လက်ရှိ အခြေအနေထက် ပိုဆိုးသွားမှာ စိုးလို့ သိပ်တော့ မထိစေချင်ပါဘူး။ ကျွန်တော်က အနည်းဆုံး ဒီအနေအထား ပြန်ရစေမယ် အာမခံပြီး ပြောတော့မှ စက်ချုပ်က သဘောတူပါတယ်။

ကဲ သုညက ပြန်စရမှာပေါ့။ အစဆုံး SG အခန်းထဲက Feedback Transmitter box ကို ဖွင့်လိုက်ပါတယ်။ အထဲမှာ Linkage လက်တံနဲ့ ဆက်ထားတဲ့ gear အဝိုင်းကြီးတစ်ခု ရှိပါတယ်။ သူ့ အသွားတွေနဲ့ ချိတ်ထားတဲ့ gear အသေး နှစ်စုံမှာ တစ်စုံက Synchro Motor ကိုသုံးထားပြီး နောက်တစ်စုံက Potentiometer တစ်ခုမှာ သုံးထားပါတယ်။ အဲဒီ Pot က Follow up mode အတွက် ဖြစ်ပါလိမ့်မယ်။ အခု Follow up position က မှန်နေတယ်ဆိုတော့ သူ့ကို မထိတော့ပါဘူး။

လက်ရှိ Rudder ရဲ့ တစ်ကယ့် အနေအထား (Physical Position) ကို Mechanical pointer နဲ့ ကြည့်တော့ 0 မှာ ရှိနေပါတယ်။ အခု ညှိမယ်ဆိုတော့ Wing indicator တွေကို အခြေခံပြီး အကုန်တူအောင် လိုက်ချိန်ရမှာပါ။ တစ်ကယ့် position 0 မှာ Wing indicator က 15S လောက် ပြနေတယ်ဆိုတော့ သု့ကို 0 ရောက်အောင် Transmitter (Tx) ကနေ ရွှေ့ယူပါမယ်။ Tx ရွှေ့ရင် Receiver (Rx) တွေဖြစ်တဲ့ indicator ၅ ခုလုံး လိုက်ပြောင်းပါလိမ့်မယ်။ ကျန်တာ နောက်မှ လိုက်ညှိတာပေါ့။

Tx Synchro motor shaft နဲ့ gear လေးကို lock လုပ်ထားတဲ့ set screw နှစ်ခုကို လျှော့လိုက်ပါတယ်။ motor shaft ကို Long nose plier လေးနဲ့ ညှပ်ပြီး နည်းနည်းစီ ရွှေ့လိုက်တော့ local indicator မှာ ရွေ့တာမြင်နေရပါတယ်။ 15P လောက် ချိန်လိုက်ပြီး Bridge က တစ်ယောက်ကို လှမ်းမေးလိုက်ပါတယ်။ Center indicator က 15P ပြတယ်။ Wing နှစ်ခုက 0 နဲ့ တော်တော် နီးနေပါပြီ။ အသေးစိတ် ထပ်ညှိပြီး 0 ရတော့ Tx  ရဲ့ gear ကို lock လုပ်လိုက်ပါတယ်။ လက်တွေ့မှာတော့ gear က box အထဲ ရောက်နေတော့ လုပ်ရတာ တော်တော် လက်ဝင်ပါတယ်။ trial and error နဲ့  တော်တော် လုပ်လိုက်ရပါတယ်။

ပြီးတော့ local indicator အဖုံးဖွင့် Pointer အတွက် set screw လေးလျှော့ပြီး 0 ပြန်ထားလိုက်ပါတယ်။

နောက် Bridge က Center indicator unit ကို 0 ပြန်ချိန်လိုက်ပါတယ်။ စမ်းကြည့်တော့ ဒီ ၄ ခု အကုန်မှန်နေပါပြီ။ Position အမျိုးမျိုး ထားကြည့်တော့ အနီးစပ်ဆုံး မှန်နေပါတယ်။ Span နည်းနည်း များနေတာတွေ့ပေမဲ့ ညှိရမယ့် preset အသေးစိတ် မသိနိုင်လို့ ဒီတိုင်း ထားလိုက်ပါတယ်။ သူကြီးကလည်း လက်ခံနိုင်တဲ့ အနေအထားမို့ပါ။ 

နောက်ဆုံး တစ်ခု ကျန်သေးတယ်။ ECR ထဲက indicator ပါ။ ECR ထဲ ဆင်းကြည့်တော့ Neutral မှာ 40P လောက် ပြနေပါတယ်။ မော်တာ လည်တဲ့ ပမာဏနဲ့ ကြည့်ရင် ၁၂၀ ဒီဂရီလောက် ကွာနေတာပေါ့။ ဒါဆိ​ုတော့ indicator ဖွင့်ပြီး မညှိတော့ပဲ Fuse box ကနေ ကြိုးပြောင်းပေးလို့ ရတာမို့ ကြိုး phase ပြောင်းပေးလိုက်တော့ အဆင်ပြေသွားပါတယ်။

ဝင်းအောင် (ပခုက္ကူ)

၁၁-၅-၂၀၂၀

Bow Thruster (4) - Follow up Mode Not Working

တစ်ခါတလေမှာတော့ အကြောင်းရင်းကို စဉ်းစားမရနိုင်တာတွေ ကြုံရပါတယ်။ ကြိုးစားတွေးယူလို့ မရနိုင်တဲ့အဆုံး လိုချင်တဲ့ ရလဒ်ရအောင်ပဲ ဖြေရှင်းပေးခဲ့ရတာတွေ ရှိပါတယ်။ 

မကြာခင်က သင်္ဘောတစ်စီးမှာ Bow Thruster ပြဿနာ သွားစစ်ပေးရပါတယ်။ Bridge ရောက်တော့ အိန္ဒိယ သူကြီးက ပြဿနာကို ရှင်းပြရင်း လက်တွေ့ စမ်းပြပါတယ်။ စက်ချုပ်လည်း အနားမှာ လာကူပါတယ်။ BT စမ်းမယ်ဆိုတော့ Generator ၃ လုံးတွဲ မောင်းခိုင်းလိုက်ပါတယ်။ Control Power On လိုက်တဲ့အချိန် Pitch  Indicator က Port 10 လောက်မှာ ပြနေပါတယ်။ ဒါဆိုတော့ ဒီ System က Motor Drive ကို CPP နဲ့ မောင်းတဲ့ အမျိုးအစားလို့ နားလည်လိုက်ပါတယ်။ Hydraulic Pump မောင်းပြီးတာနဲ့ BT motor ကို Run လိုက်ပါတယ်။ Control Selector Switch ကို WH ယူထားပါတယ်။ (ဒီအနေအထားက Follow Up (F/u) mode ပေါ့။) လက်ရှိ Control Knob က Mid ship (0 position) မှာပါ။

သင်္ဘောသားတစ်ယောက်ကို Forward မှာ စောင့်ကြည့်ဖို့ Walkie Talkie နဲ့ အကြောင်းကြားထားပါတယ်။ အခုအနေအထားမှာ Motor လည်နေပါပြီ။ Port နဲ့ Stbd ဘယ်ဘက်မှာမှ ရေ တွန်းထုတ်တာ မမြင်ရပါဘူး။ ဒါဆို Pitch 0% ဆိုတာ အကြမ်းဖျင်း မှန်တယ်လို့ ယူဆနိုင်ပါတယ်။ (နောက်မှ သေချာအောင် ထပ်ကြည့်ပါမယ်။) ဒါပေမဲ့ indicator က Port 10% လောက်မှာပါ။ Control ကို Port ဘက်ရွှေ့ကြည့်ပါတယ်။ မပြောင်းပါဘူး။ Stbd ဘက် ရွှေ့ကြည့်တော့လည်း ဘာမှ မထူးပါဘူး။

ဒါနဲ့ Selector Switch ကို N/F ဆိုတဲ့ နေရာ ရွှေ့လိုက်ပါတယ်။ (ဒါက Non Follow-up Mode (NFU) ပါ။ တချို့ သင်္ဘောမှာတော့ Emergency Mode လို့လည်း သုံးပါတယ်။) အဲဒီ အနေအထားမှာ Push Button နဲ့ မောင်းရပါတယ်။ Push Button နှိပ်ပြီး မောင်းကြည့်တော့ သင်္ဘောဦး ဘေးဘက်ကို ရေတွေတွန်းထုတ်တာ မြင်ရပါတယ်။ Port ရော Stbd ပါ နှစ်ဘက်လုံး ကောင်းပါတယ်။ ဒါပေမဲ့ Pitch indicator က Port 10 နေရာမှာ ငြ်ိမ်နေပါတယ်။ ဘယ်မှ မရွေ့ပါဘူး။ နောက်ပြီး Motor Current indicator ကလည်း တလျောက်လုံး 0 မှာပဲပြပါတယ်။ ဒါလည်း မမှန်ပါဘူး။ နောက် Selector Switch ကို Wing control station နှစ်ခုဆီ တစ်လှည့်စီ ရွှေ့ပြီး စမ်းပြပါတယ်။ ဘယ်မှာမှ အလုပ် မလုပ်ပါဘူး။

ပြဿနာသိသွားပြီဆိုတော့ Trouble-shoot လုပ်ရမယ့်အပိုင်း ရောက်လာပြီပေါ့။ Drawing တွေဖတ်ပါတယ်။ System ကို နားလည်အောင်ကြည့်ပါတယ်။ နောက်ပြီး Motor မမောင်းပဲ Hydraulic pump ကိုပဲ မောင်းပြီး စမ်းကြည့်ပါတယ်။ အတူတူပါပဲ။ NFU မှာတော့ အလုပ်လုပ်တယ်။ Follow up (F/u) mode မှာ အလုပ်မလုပ်ပါဘူး။ ဒီ system ရဲ့ design က တစ်မျိုး။ Feedback unit မှာ potentiometer တစ်ခုထဲ ရှိပါတယ်။ Follow up အတွက် feedback နဲ့ indicator အတွက် feedback ကို ခွဲမထားပါဘူး။

အဲဒီလို ကျွန်တော်တို့ စစ်နေတုန်းမှာ စက်ချုပ်က Clue တစ်ခု ပေးလာပါတယ်။ Wing Control Station တွေ သေချာ စစ်ကြည်ဦးတဲ့။ Batam မှာ Dock ဝင်တော့ Yard က Wing Station နှစ်ခုကိုဖြုတ်၊ Steel work တွေ ပြင်ဆင်ပြီး ပြန်တပ်ထားတာတဲ့။ Dock မဝင်ခင်က ကောင်းတယ်လို့ ပြောပါတယ်။ Dock ထွက်လာမှ ပြဿနာတက်တာတဲ့။

ဒါဆိုတော့ စဉ်းစားရ သက်သာ သွားတာပေါ့။ Wing Station မှာ ရှိတဲ့ ကြိုးတွေထဲက BT နဲ့ပတ်သတ်တဲ့ ကြိုး ၁၈ ချောင်း ရှိပါတယ်။ အဲဒီထဲက ၅ ချောင်းက Control command နဲ့ indicator အတွက်။ Drawing နဲ့ တိုက်ကြည့်ပြီး ကြိုးအဝင် terminal နံပါတ်တွေ ကြည့်ပါတယ်။

အဲဒီမှာ Wing (P) ဘက်က ကြိုး ၅ ချောင်းက terminal တစ်ကွက်စီ ချော်ပြီး ဆက်ထားတာ တွေ့ရပါတယ်။ အဲဒီ ကြိုး ၅ ချောင်းရဲ့ label တွေ ကြည့်ထားပြီး ဖြုတ်လိုက်ပါတယ်။ ဒီတစ်ခါ ကြိုး ၅ ချောင်း ဖြုတ်ထားပြီး ပြန်စမ်းကြည့်တော့ Indicator က 0 position မှာ ပြနေပါပြီ။  terminal အမှန် ပြန်မတပ်ခင် Wing Control potentiometer ကောင်းလား စစ်ကြည့်ပါတယ်။ ကောင်းပါတယ်။ ဒါနဲ့ ကြိုးတွေပြန်တပ်ကြည့်တော့လည်း မကောင်းသေးပါဘူး။ 

ဒါနဲ့ အဲဒီကြိုးနံပါတ်တွေကြည့်လိုက်တော့ Label တွေက ဖြုတ်လို့၊ တပ်လို့ ရတယ်ဆိုတာ တွေ့ရပါတယ်။ ဒါဆို ကြိုးနံပါတ်တွေလည်း မယုံရပြန်ဘူး။ ဒါနဲ့ Wheelhouse Console နဲ့ Wing (P) ကြားထဲမှာ အဲဒီ ကြိုး ၅ ချောင်းကို Loop check လုပ်ကြည့်တော့ ထင်တဲ့အတိုင်း နံပါတ်တွေ မှားနေပါတယ်။ အမှန်ပြန်ထားပြီး တပ်လိုက်ပါတယ်။ ဒီတစ်ခါ power ပြန်ဖွင့်တော့ indicator က Stbd ဘက် အစွန်ဆုံးထိ ကပ်နေတာ တွေ့ပါတယ်။ ကြိုး ၅ ချောင်း ပြန်ဖြုတ်ပြီး Power ပြန်ဖွင့်ကြည့်တော့လည်း မထူးပါဘူး indicator က Stbd အစွန်မှာ ကပ်မြဲ ကပ်နေပါတယ်။ တော်တော်လေး ချွေးပြန်သွားပါတယ်။ စောစောက ကြိုးတွေ ပြန်တပ်ကြည့်တုန်းက ဒုက္ခပေးပြီး Control Box ထဲက တစ်ခုခု လောင်သွားလို့လား  မပြောတတ်ပါဘူး။

ကြားထဲမှာ ကိုတိုးအောင်ဆိုတဲ့ အစ်ကိုတစ်ယောက် ပြောဖူးတာ ပြန်သတိရမိတယ်။ သူ့မိတ်ဆွေ တစ်ယောက် အိမ်ဘေးအိမ်က ကားတစ်စီး စက်နှိုးမရတာ အကူအညီတောင်းလို့ သွားစစ်ပေးရတယ်တဲ့။ စမ်းကြည့်တော့ Starter motor က ဖွတ်ချက်ဖွတ်ချက်နဲ့ လည်နေပေမဲ့ အင်ဂျင်က မနိုးဘူးတဲ့ တတ်သလောက် မှတ်သလောက် နှိုက်ချွတ်ပြီး ပြန်စမ်းမယ် လုပ်တော့ စောစောထဲက အားနည်းနေတဲ့ ဘက်ထရီက down သွားပြီ။ အဲဒီတော့ ကားပိုင်ရှင်က ပြောတယ်။ မင်းမပြင်က ဖွတ်ချက်ဖွတ်ချက် အသံကြားရသေးတယ်။ မင်းပြင်တော့မှ ဖွတ်ချက်ဖွတ်ချက်တောင် မကြားရဘူးလို့ ပြောသတဲ့။ အခုလည်း ကျွန်တော်တို့ ပြင်လိုက်မှ Indicator က Port 10 မှာတောင် မပြတော့ဘူး။

မတတ်နိုင်ဘူး ဆက်ပြီး အဖြေရှာရမှာပေါ့။ ပထမ Control Module ထဲက တစ်ခုခု ဖြစ်သွားသလားလို့ သံသယရှိတာနဲ့ WH console အောက်က control module ကို ဖွင့်လိုက်ပါတယ်။ သူ့အောက်က Power supply ကို တိုင်းကြည့်တော့ 24V DC ထွက်ပါတယ်။ ဒါနဲ့ PCB တစ်လွှာစီ ဖွင့်ထုတ်ပါတယ်။ ညှော်နဲ့တော့ မရပါဘူး။ သေချာကြည့်တော့ လောင်ထားတဲ့ ပုံစံ ဘယ်မှာမှ မတွေ့ရဘူး။ Fuse ပါမလား ရှာတော့လည်း မတွေ့ပါဘူး။ အောက်ဆုံး PCB တစ်လွှာမှာတော့ Reset လုပ်လို့ရတဲ့ Thermal Fuse လေး ၄ ခု တွေ့ပါတယ်။

Trip ဖြစ်၊ မဖြစ် သေချာမမြင်ရပါဘူး။ ဘာပဲဖြစ်ဖြစ် reset နှိပ်ကြည့်ပါတယ်။ တစ်ခြား ဘာမှ ထူးထူးခြားခြား မတွေ့ရတာနဲ့ အကုန် ပြန်တပ်ပါတယ်။ Power ပြန်ဖွင့်တော့လည်း မထူးပါဘူး။

နောက် တစ်ဆင့် ပြန်စဉ်းစားပါတယ်။ BT room ထဲမှာ ရှိတဲ့ Feedback module က ဘယ် အခြေအနေ ရှိလဲ စစ်ကြည့်ရပါမယ်။ အဲဒီအချိန် Wing (p) station က ကြိုး ၅ ချောင်း ပြန်မတပ်သေးပါဘူး။ ဘာပဲဖြစ်ဖြစ် ပြဿနာရဲ့ အစက အဲဒီဘက်က ဖြစ်နိုင်ချေ များနေတာကိုး။ အဲဒီ station မပါပဲ အရင် ကောင်းအောင် လုပ်ကြည့်ရပါမယ်။

Feed back unit အခြေအနေ သိချင်တာနဲ့ Feed back potentiometer က လာတဲ့ ကြိုး ၃ ချောင်းကို ့ဖြုတ်လိုက်ပါတယ်။ နောက်ပြီး resistance တိုင်းကြည့်တော့ 2 k ohm pot မှာ အလယ်စက တစ်ဝက်မှာ ရှိမနေပါဘူး။ တစ်ဘက် ကပ်နေပါတယ်။ အဲဒီ အချိန်မှာ NFU mode ကိုပြောင်းပြီး push button တွေနှိပ်ကြည့်တော့ ohm ပြောင်းပါတယ်။ ဒါဆိုရင် NFU အပိုင်းက အလုပ်လုပ်နေသေးတယ်ပေါ့။ Resistance တိုင်းထားရင်း Feedback pot ကို အလယ်လောက် ရောက်အောင် NFU ခလုတ်နှိပ်ပြီး ညှိလိုက်ပါတယ်။ တစ်ဘက် 1 k စီလောက် အနီးစပ်ဆုံး ရတော့ ကြိုး ၃ စ ပြန်တပ်လိုက်ပါတယ်။ အဲဒီတော့ indicator က 0 position ပြပါတယ်။ နည်းနည်းတော့ အားပြန်တက်လာတယ်။ ဒါနဲ့ FU mode ရွှေ့လိုက်တော့ indicator 0 ကနေ မပြောင်းပါဘူး။ Command Dial ကို လှည့်ပြီး Port 5 လောက် ရွှေ့ကြည့်တယ်။ ilIndicator က Stbd ဘက် ဆွဲချသွားပြီး အစွန်မှာ ပြန်ကပ်နေပါတယ်။ NFU mode ပြန်ပြောင်း။ ခလုတ်နှိပ် ရွှေ့ကြည့်တော့လည်း မရွေ့ပါဘူး။ ဒါနဲ့ Feedback ကြိုး ၃ ချောင်း ပြန်ဖြုတ်၊ NFU ခလုတ်နဲ့ ကစားကြည့်တော့ ပြန်ရွေ့ပါတယ်။ Pot Resistance အလယ်ကျအောင် ပြန်ညှိ။ နောက်တစ်ခေါက် feedback ကြိုး ၃ ချောင်း ပြန်တပ်တော့ indicator midship ပြန်ရောက်နေပါတယ်။ ဒီတစ်ခါ NFU mode ခလုတ်နဲ့ ကစားကြည့်တော့ indicator အလိုက်သင့် ရွေ့ပါတယ်။ ဒါဆိုရင် စောစောက အစွန်ဆုံး ရောက်သွားလို့ Control လုပ်မရတာလားမသိဘူး။ အလယ်ဝန်းကျင်မှာတော့ push button နဲ့ ဟိုဘက်ဒီဘက် ကစားလို့ ရနေပါတယ်။

အဲဒီတုန်းမှာ သတိထားမိသွားတာက Command ခလုတ်နဲ့ Indicator ရွေ့တာ ပြောင်းပြန် ဖြစ်နေပါတယ်။ Port ကို နှိပ်ကြည့်ရင် Stbd သွားတယ်။ Stbd ဘက် နှိပ်ရင် Port ဘက် ရွေ့တယ်။ Feedback ကြိုးတွေ မှားတပ်မိတာလားလို​့ ကြိုးနံပါတ်နဲ့  Drawing နဲ့ ပြန်တိုက်ကြည့်တော့လည်း မမှားဘူး။ တစ်ခုခုတော့ လွဲနေတယ်။ စမ်းကြည့်တာပေါ့။ Feedback ကလာတဲ့ ကြိုးကို ပြောင်းပြန် တပ်လိုက်ပါတယ်။ ပြန်စမ်းကြည့်တော့ Indicator နဲ့ command direction တူသွားပြီ။ နောက်တစ်ဆင့် F/ u mode ကို ပြောင်းလိုက်ပါတယ်။ Command 0 မှာ indicator 0 နီးပါး ပြနေပါတယ်။ နည်းနည်းစီ ရွှေ့ကြည့်တော့ အမှန်အတိုင်း indicator လိုက်ရွေ့ပါတယ်။ အဆုံးထိ ရွှေ့တော့လည်း အဆင်ပြေပါတယ်။

စောစောက Feedback ကြိုး ပြောင်းပြန် ဖြစ်နေတာမို့ F/u mode မှာ System က ပြောင်းပြန်နားလည်ပြီး Control signal ကိ​ု ဆန်ကျင်ဘက် လိုက်ညှိရင်း Stbd အစွန်ထိ ရောက်သွားတာဖြစ်မယ်ထင်တယ်။ အခုတော့ အဆင်ပြေ သွားပြီ။ 

ဒါပေမဲ့ တစ်ကယ်မှန်တာ ဟုတ်၊ မဟုတ် မသေချာပါဘူး။ Feed back ကြိုး ပြောင်းပြန်ရွှေ့လိုက်ရတာဆိုတော့ တစ်ကယ့် Pitch က ဘယ်ဘက် သွားနေတာလဲ ပြန်စစ်ကြည့်ရပါမယ်။ ဒါနဲ့ BT room ထဲ ဆင်း သွားပါတယ်။ အောက်ခြေ အခန်းထဲမှာ မော်တာ ခပ်ကြီးကြီး တစ်လုံးကို ဇောက်ထိုး ထောင်ပြီး တပ်ထားတာ တွေ့ရပါတယ်။ မော်တာ အောက် ကြားထဲကနေ ချောင်းကြည့်လိုက်တော့ Feedback unit လေးကို တွေ့ရပါတယ်။

Feedback unit ရဲ့ Pitch position scale တွေကတော့ Linear ပြထားပါတယ်။ Pitch ရွေ့ရင် pointer လေးက အလျားလိုက်ရွေ့အောင် ဒီဇိုင်း လုပ်ထားပါတယ်။ Potentiometer ကိုတော့ဘယ်လို တပ်ထားတယ် မသိပါဘူး။ ကိစ္စမရှိဘူး Pitch တစ်ကယ် ရွေ့တဲ့ position ကိုပဲ သိချင်တာဆိုတော့ ဒီတိုင်း ချောင်းကြည့်ရင် ဖြစ်တယ်။ 

ပါလာတဲ့ ညီလေးကို စောင့်ကြည့်ခိုင်းပြီး Bridge ကနေ သွား မောင်းကြည့်ပါတယ်။ Motor မမောင်းပဲ Hydraulic pump ချည်း မောင်းစမ်းတာဆိုတော့ ကိုယ့်ဘာသာ အချိန်မရွေး စမ်းလို့ အဆင်ပြေပါတယ်။ ဒါနဲ့ Port ဘက်ကို လှည့်ကြည့်တော့ တစ်ကယ့် Pitch က Stbd ဘက်ကို သွားပါတယ်။ Stbd ဘက်လှည့်တော့ Port ဘက်ကို သွားပါတယ်။ ပြောင်းပြန် ဖြစ်နေတာပေါ့။ 

ဘာလို့ ဒီလို ပြောင်းပြန် ဖြစ်သွားရတာလဲ စဉ်းစားလို့ မရပါဘူး။ နောက်ဆုံးတော့ ပြဿနာရဲ့ အကြောင်းရင်း ရှာမရတဲ့အဆုံး ပြေလည်အောင် ဖြေရှင်းဖို့ပဲ ဆုံးဖြတ်လိုက်ပါတယ်။ Feedback ကြိုးတွေကို မူလအတိုင်း ပြန်ပြောင်းလိုက်ပါတယ်။ ပြီးမှ Solenoid ကို သွားတဲ့ ကြိုးကို Port နဲ့ Stbd ပြောင်းပြန်လဲတပ်လိုက်ပါတယ်။ စမ်းကြည့်တော့ အားလုံး အဆင်ပြေသွားပါတယ်။ F/u mode မှာ တစ်ကယ့် Pitch position နဲ့ Command တော်တော်လေး နီးစပ်အောင် မှန်ပါတယ်။ NFU mode မှာလည်း အလုပ်လုပ်ပါတယ်။ 

နောက်ဆုံးအဆင့် Wing (P) station က ကြိုး ၅ ချောင်းကို loop check တစ်ခေါက် ပြန်လုပ်ပြီး Drawing ထဲကအတိုင်း တပ်လိုက်ပါတယ်။ စမ်းကြည့်တော့ အဆင်ပြေပါတယ်။

သူကြီးနဲ့ စက်ချုပ်ကိုခေါ်ပြီး စမ်းပြပါတယ်။ F/u mode , NFU mode, Wing Station နှစ်ခု စမ်းကြည့်တော့ အကုန် အလုပ်လုပ်ပါတယ်။ Motor နဲ့ မောင်းစမ်းကြည့်ပါတယ်။ Motor Current indicator ကလည်း အမှန်ပြသွားပါပြီ။ သူကြီးလည်း ကျေနပ်သွားပါတယ်။

ကျွန်တော့် စိတ်ထဲကတော့ သိပ်ဘဝင်မကျခဲ့ပါဘူး။ ဘာပဲဖြစ်ဖြစ် ပြေလည်အောင်တော့ လုပ်ပေးခဲ့ရတာပေါ့။

ဝင်းအောင် (ပခုက္ကူ)

၈-၅-၂၀၂၀

Insulation Resistance (11) - 220V Low Insulation

တစ်ခါတလေ ပြဿနာက မမျှော်လင့်တဲ့ အနေအထားနဲ့ အဖြေရသွားတာလည်း ရှိတတ်ပါတယ်။ 

Bunker Barge တစ်စီးမှာ 220V Low insulation ပြဿနာ စစ်ပေးရပါတယ်။ အမှန်ကတော့ တခြား အလုပ်တစ်ခု လုပ်ရင်း ဒီဟာ ကြည့်ပေးရတာပါ။ MSB ရဲ့ 220V feeder panel မှာ Low insulation alarm လာနေတယ်။ Insulation Meter မှာ 0.3 M ohm လောက်ပြနေတယ်။ Generator ပြောင်းပြီး မောင်းကြည့်တော့လည်း အတူတူပဲလို့ ပြောပါတယ်။ ဒါနဲ့ 220V breaker တွေ တစ်ခုပြီး တစ်ခု ချကြည့်တော့ breaker အကုန် ချပြီးပေမဲ့ Low insulation က ရှိနေတုန်းပါပဲ။ အဝင် Transformer 1 နဲ့ 2 ကို ပြောင်းကြည့်ပေမဲ့ မထူးပါဘူး။ ဒါဆို Panel ထဲကပဲ ဖြစ်နိုင်ပါတော့တယ်။

အဲဒီမှာ စက်ချုပ်က ရာဇဝင်ခင်းပြပါတယ်။ သိပ်မကြာခင်က ဒီ panel ထဲမှာ ရှိတဲ့ Magnetic Contactor (MC) တစ်လုံးရဲ့ အဝင်ကြိုးတွေထဲက တစ်ခုလောင်သွားလို့ လဲထားတယ်ပြောပါတယ်။ အခု နောက်တစ်ကြိုးကလည်း insulation အကာတွေ ကွဲအက်ပြီး အခြေအနေ မကောင်းဘူး။ MC ကလည်း အပြင်က ရာဘာ အကာတွေ မဲပြီး လောင်တဲ့ အရာရှိနေတယ်။ MC အသစ်လည်းရှိတော့ ဖြစ်နိုင်ရင် လဲပေးဖို့ ပြောပါတယ်။ ဒါတွေကြောင့် Low insulation ဖြစ်သလား မသိဘူး ပြောပါတယ်။

ကြည့်လိုက်တော့ Panel ထဲမှာ MC အလတ်စား ၂ လုံး တွေ့ပါတယ်။ ဒီ MC တွေက 415V to 220V transformer ၂ လုံးရဲ့ အထွက်မှာ ရှိပါတယ်။ Transformer ၂ လုံးကို တစ်လှည့်စီ သုံးဖို့ ထိန်းထားတဲ့ MC တွေပါ။ အခြေအနေကြည့်လိုက်တော့ အဲဒီ MC ၂ လုံးကို ရဲ့ အပေါ် အထွက်မှာ Looping လုပ်ထားတဲ့ ကြိုး ၃ ချောင်းမှာ တစ်ချောင်းက အခြေအနေ တော်တော် ဆိုးပါတယ်။ လဲဖို့ 50 mm2 ကြိုးရှိပေမဲ့ cable lug တွေ crimping tool တွေ မရှိတာမို့ နောက်နေ့မှ loop cable တွေ workshop ကနေ လုပ်ပြီး ယူခဲ့ဖို့ စီစဉ်လိုက်ပါတယ်။

နောက်နေ့ loop cable တွေကို cable lug တပ်ပြီး ယူလာခဲ့ပါတယ်။ Bus bar နဲ့ ကပ်နေတာမို့ Black our လုပ်ပြီး လဲဖို့ လုပ်ကြပါတယ်။ Black out လုပ်ထားတုန်း MC နဲ့ loop cable လဲတပ်ပါတယ်။ Power မရှိတုန်း Ground နဲ့ 220V busbar တွေကြား resistance တိုင်းကြည့်တော့ 0.3 M ohm လောက် ရှိနေပါတယ်။ MC နဲ့ cable လဲပြီးတော့လည်း အဲဒီလောက် ရှိနေတုန်းပါပဲ။ Black out လုပ်ထားတာလည်း နည်းနည်းကြာသွားပြီမို့ မီးပြန်ဖွင့်ဖို့ ခိုင်းလိုက်ပါတယ်။ မျှော်လင့်ထားတဲ့အတိုင်း Low insulation က ဆက်ရှိနေတုန်းပါပဲ။

Panel ထဲမှာကြည့်လိုက်တော့ အရင်ကြိုးလောင်ထားတဲ့ မီးခိုးတွေစွဲပြီး ညစ်ပတ်နေပါတယ်။ ဒီမီးခိုးမှိုင်းတွေရဲ့ ကာဗွန်တွေကြောင့် insulation ကျနေတာများလားမသိဘူး။ သေချာအောင် Drawing ကြည့်ပြီးတစ်ပိုင်းစီ လိုက်ကြည့်ဖို့ ဆုံးဖြတ်လိုက်ပါတယ်။ Bus bar နဲ့ Control circuit မှာ Low insulation ရှာဖို့က လွယ်တော့ မလွယ်လှပါဘူး။ ကြိုးစားကြည့်ရမှာပဲ။ Panel ထဲက Control Circuit တွေကို ပိုင်းမယ်ဆိုတော့ Insulation Meter အဝင် sensing wire ရဲ့ Fuse ကို အစဆုံး ဖြုတ်ကြည့်ပါတယ်။ Insulation fault ပျောက်သွားတယ်။ ဒါဆို မီတာ အလုပ်လုပ်နေတာ သေချာပြီ။ အဲဒီ sensing wire fuse ရဲ့ နောက်ပိုင်း ဆက်လိုက်ကြည့်ရမယ်။ Fuse ပြန်တပ်တဲ့အခါ insulation meter မှာ Power မရှိတော့တာ တွေ့ရပါတယ်။ ဘာဖြစ်သွားတာလဲ မသိပါဘူး။

မီတာအဝင် Fuse တွေ စစ်ကြည့်တော့ ကောင်းပါတယ်။ Fuse အထွက် 220V လည်းရှိပါတယ်။ မီတာမှာ Supply Volt တိုင်းကြည့်တော့ မရှိပါဘူး။ Fuse နဲ့ insulation meter ကြားထဲမှာ ဘယ်လိုဖြစ်ပြီး Power ပျောက်သွားရတာလဲ။ ဒါက ကြားဖြတ်ပေါ်လာတဲ့ ပြဿနာ အသစ်။ ဒုက္ခပါပဲ။ 

မတတ်သာတဲ့ အဆုံး ကြိုးတွေ ဆွဲပြီး tracing လုပ်ရပါတော့တယ်။ အဲဒီမှာ insulation meter ရဲ့ power supply ကြိုး ၂ ချောင်းက Drawing ထဲကအတိုင်း မဟုတ်ပဲ ကြိုးအသစ် တစ်စုံနဲ့ Modified လုပ်ထား တွေ့ရပါတယ်။ အဲဒီကြိုး တစ်စုံက တစ်ခြား Circuit တစ်ခုမှာ သွားပေါင်းထားတာ တွေရပါတယ်။ အဲဒီ circuit မှာ power တစ်စ ပျောက်နေပါတယ်။ ဆက်လိုက်ကြည့်တော့ Panel နောက်ကျောဘက်က မီးချောင်းတွေရဲ့ circuit ဖြစ်နေပါတယ်။ ခလုတ် မကောင်းလို့လား။ တိုင်းကြည့်တော့ ခလုတ် အဝင်ရော အထွက်ပါ Power မရှိပါဘူး။ Drawing အရ အဲဒီ circuit ရဲ့ အဝင် fuse တွေကြည့်လိုက်တော့ Fuse တစ်လုံး ပြတ်နေတာတွေ့ရပါတယ်။ ဒါနဲ့ fuse အသစ်လဲလိုက်တော့ insulation meter မှာ power ပြန်ရောက်သွားပါပြီ။

စောစောက Supply Power ပျောက်လို့ ကြိုးတွေကို trace လုပ်တဲ့အချိန်တုန်းက ဘာလို့ရယ်မသိဘူး။ စိတ်ထဲ ပေါ်လာတာနဲ့ power မရှိတဲ့ ကြိုးကို ground နဲ့ resistance တိုင်းကြည့်လိုက်မိတော့ 0.3 M ohm ပဲ ရှိတာ သတိထားလိုက်မိပါတယ်။ အခု insulation meter မှာ power ပြန်ရပြီး Low insulation ပြန်ဖြစ်နေတဲ့ အချိန်မှာ အဲဒီ circuit ရဲ့ Panel ကျောဘက်က မီးချောင်းတွေဆီ သွားတဲ့ ကြိုးတွေအကုန် terminal ကနေ ဖြုတ်ကြည့်လိုက်ပါတယ်။ Insulation 5 M ohm လောက် ပြန်ရောက်သွားပါတယ်။ ကောင်းသွားတယ်ပေါ့။ ဒါဆို မီးချောင်း ၂ ခုထဲက တစ်ခုခု earth fault ဖြစ်နေတာ သေချာသွားပါပြီ။ 

ကျန်တဲ့အပိုင်းက လွယ်သွားပါပြီ။ ဆက်ရှာကြည့်တော့ မီးချောင်းတစ်ခုမှာ ballast (choke) ရဲ့ connector မှာ သံချေးကိုက်ပြီး ground ကျနေတာပါ။ choke အသစ် လဲလိုက်တော့ ပြေလည်သွားတာပေါ့။

ဒါကြောင့် တစ်ခါတလေ ပြဿနာရဲ့ အဖြေက မမျှော်လင့်ပဲ တွေ့တတ်ပါတယ်လို့။

ဝင်းအောင် (ပခုက္ကူ)

၁-၅-၂၀၂၀