တစ်ခါတလေ ပြဿနာက မမျှော်လင့်တဲ့ ရှုထောင့်က လာတတ်ပါတယ်။ မဖြစ်နိုင်ဘူးဆိုပြီး ဖယ်ထားတဲ့ အရာက တစ်ကယ့်ပြဿနာ သွားဖြစ်နေတာမျိုးလည်း ကြုံရတတ်ပါတယ်။ သင်္ဘောကျင်း တစ်ခုမှာ လွန်းတင်ထားတဲ့ သင်္ဘောတစ်စီးက Generator တစ်လုံး voltage ညှိမရဘူးဆိုပြီး လှမ်းခေါ်လို့ သွားခဲ့ရပါတယ်။
LNG သင်္ဘောပါ။ Steam Turbine Generator (TG #1) ရဲ့ voltage က ညှိမရဘူး ပြောပါတယ်။ စမ်းမောင်းကြည့်တော့ 7500 V လောက် ပြပါတယ်။ MSB ပေါ်က Trimmer ကို လှည့်ကြည့်တော့ ဘာမှ မထူးပါဘူး။ AVR က Siemens 6GA2490 အမျိုးအစားပါ။ Hyundai Genset တွေမှာ တွေ့ရလေ့ရှိပါတယ်။ အဲဒီပေါ်က Voltage အတွက် preset ကို လှည့်ကြည့်တော့လည်း ဘာမှ အပြောင်းအလဲ မရှိပါဘူး။ ဒါနဲ့ စက်ပြန်ရပ်ပြီး စက်ချုပ်နဲ့ စကားပြောကြည့်ပါတယ်။ သူတို့ ပြောတာကတော့ AVR က အသစ်ထည့်ထားတာလို့ ပြောပါတယ်။
Genset က Static Excitation Circuit ပါတဲ့ Hyundai အမျိုးအစားပါ။ Operating voltage 6600V မှာ အခု 7500V ဖြစ်နေတယ် ညှိလို့ မရဘူးဆိုတော့ AVR ကြောင့် ဖြစ်ဖို့ ရာနှုံးများပါတယ်။ ဒါပေမဲ့ AVR အသစ်ထည့်ထားတာဆိုတော့ ဓာတ်ကြိုးနဲ့ Super က တစ်ခြားတစ်ခုခု လို့ ထင်နေပါတယ်။
ဒါကြောင့် Circuit ကိုပြန်ဖတ် ဖြစ်နိုင်စရာတွေ စဉ်းစားကြည့်ပါတယ်။ MSB ပေါ်က Trimmer မကောင်းလို့လား။ AVR နဲ့ Manual Voltage Regulator (MVR) ပြောင်းတဲ့ circuit ကြောင့်လား။ AVR ဆီ power supply မရောက်လို့လား။ နောက်တစ်ခုက drawing အရ Trimmer နှစ်ခု ရှိပါတယ်။ Swbd #1 (သို့) Swbd #2 ကနေ control လုပ်လို့ ရအောင်ထားပေးတာပါ။ အဲဒီ contactor မကောင်းလို့လား။ ဒီ ၃ မျိုးပဲ စစ်ဖို့ ရှိပါတယ်။ 7500V ထွက်နေတယ်ဆိုတော့ Excitation circuit နဲ့ Generator အပိုင်းကို ကြည့်စရာ မလိုတော့ပါဘူး။
ပထမ MSB trimmer မှာ ohm တိုင်းထားပြီး လှည့်ကြည့်တော့ 0-1.5 k ohm မှာ အပြတ်အတောက်မရှိ ကောင်းပါတယ်။ ဒါဆို potentiometer ကြောင့် မဟုတ်တော့ဘူး။ ဒီ pot က resistance ကို AVR ဆီ ဝင်ရမှာ ဖြစ်တဲ့အတွက် လမ်းမှာ open ဖြစ်နေလား စစ်ရပါမယ်။ ဒါနဲ့ AVR panel ဆီ သွားပါတယ်။ AVR အဝင်ကနေ ထောက် တိုင်းထားပြီး Trimmer pot ကို လှည့်ကြည့်တော့ ကောင်းပါတယ်။ ဒါဆို Trimmer နှစ်ခု ပြောင်းပေးတဲ့ Contactor ကြောင့်လည်း မဟုတ်တော့ပါဘူး။ AVR အဝင် power ရောက်၊ မရောက် စစ်ဖို့ပဲ ရှိပါတယ်။ ဒါနဲ့ လောလောဆယ် မောင်းနေတဲ့ TG# 2 ရဲ့ AVR အဝင်ကို တိုင်းကြည့်ပါတယ်။ 6.6kv ဆိုပေမဲ့ AVR ဆီကို step down transformer နဲ့ ချထားပြီးတာမို့ Low Voltage ပဲ ရှိမှာပါ။ တိုင်းကြည့်တော့ 27 V AC လောက်ပဲ ရှိပါတယ်။ နောက်တစ်ခါ စက်ပြန်မောင်းခိုင်းပြီး AVR အဝင်တိုင်းကြည့်ပါတယ်။ TG #1 မှာလည်း 27V လောက် ရှိပါတယ်။ ဒါနဲ့ Super ကို confidence ရှိရှိနဲ့ ပြောလိုက်တယ်။ AVR က ဖြစ်နေတာလို့။ နောက် အသစ်ရှိရင် လဲကြည့်ရအောင်လို့ ပြောပါတယ်။ သူတို့ store မှာ သွားမွှေပြီး နောက် အသစ်တစ်လုံး ရလာပါတယ်။ အဲဒီတစ်လုံး လဲပြီး စမ်းကြည့်တော့ အဆင်ပြေနေပါပြီ။ trimmer က ချတာ 6900V လောက် ရပါတယ်။ AVR ပေါ်က preset နဲ့ ချတော့ လိုချင်သလို ရပါတယ်။ Trimmer ကို အလယ်လောက်မှာ ထားပြီး preset နဲ့ 6600V ဝန်းကျင် ချိန်ပေးခဲ့ပါတယ်။ အသေးစိတ် trimmer နဲ့ ကစားနိုင်ပါတယ်။
ပြန်ကြည့်ရရင် AVR အသစ်ဆိုပြီး မဖြစ်နိုင်ဘူးလို့ ဖယ်ထားပေမဲ့ အသစ်ကိုယ်နှိုက်ကလည်း မကောင်းတာ ဖြစ်နိုင်တယ် ဆိုတာပါ။
ဝင်းအောင် (ပခုက္ကူ)
၃၁-၈-၂၀၁၉
မှတ်ချက်။ ။ ကျွန်တော်ရေးတဲ့ စာတွေကို ၂၀၂၀ ဇန္နဝါရီကစပြီး ယူနီကုဒ် တစ်မျိုးထဲ နဲ့ ရေးပါတော့မယ်။ မိတ်ဆွေ အားလုံးကို ယူနီကုဒ် ပြောင်းလဲ သုံးကြဖို့ တိုက်တွန်းပါတယ်။
No comments:
Post a Comment