Alarm Monitoring System (၁) - DG Leakage Alarm

ပြီးခဲ့တဲ့ ၂ နှစ်ကျော် လောက်ကပါ။ Owner က အလုပ်အပ်လာပါတယ်။ သူစစ်ကြည့်လာတဲ့ သင်္ဘောပေါ်က ပြဿနာ တစ်ခုကို သွားရှင်းပေးဖို့ပြောပါတယ်။ ပြဿနာက DG တစ်လုံးရဲ့ leakage alarm ပါ။ well ထဲမှာလည်း ရေမရှိဘဲနဲ့  alarm အမြဲတက်နေလို့ တဲ့။သူပြောပြချက်အရ alarm system က Normally close (NC) signal ကိုယူတယ်။  float switch output က ပြောင်းပြန်ဖြစ်နေတယ် တဲ့။ အဲဒါ 24V DC relay တစ်လုံး ယူသွားပြီး circuit ကို modify လုပ်ပေးဖို့ မှာလိုက်ပါတယ်။ သင်္ဘောပေါ်ရောက်တယ် ဆိုယင်ဘဲ owner ကြည့်ပြီးသားဆိုတော့ ဘာမှ မစဉ်းစားမိတော့ဘဲ modify လုပ်ဖို့ လိုက်ကြည့်တာပေါ့နော်။ terminal တွေ ဘယ်မှာလဲ။ 24V source ဘယ်ကယူမလဲ။ ဘယ်မှာ relay ထိုင်မလဲ။ Din rail (omega rail) ရှိလား။ အဲဒါတွေလိုက်ကြည့်တာပေါ့။

နောက်ပြီးမှ မဆင်ခင် စက်ချုပ်နဲ့ စကားပြောကြည့်တယ်။ ဒီပြဿနာက အစထဲကဖြစ်တာလား ဆိုတော့ နည်းနည်းတော့ ကြာသွားပြီ။ ဒါပေမဲ့ အစထဲကဖြစ်တာ မဟုတ်ဘူး ပြောပါတယ်။ float switch လဲထားသေးလား မေးတော့ မလဲဘူးတဲ့။
ဒါဆို တစ်ခုခု မှားနေပြီ။ ပြဿနာရဲ့ ဇစ်မြစ် (root cause) ကို မရှာဘဲ အဆင်ပြေအောင် ပြင်ဖို့ လုပ်နေသလို ဖြစ်နေတာပေါ့။ ဒါနဲ့ DG engine ဘေးမှာ float switch ကိုသွားကြည့်တယ်။ float switch ထိပ်က junction box ထဲမှာ ကြိုး ၂ စ ပူးပြီး bypass လုပ်ထားတာ တွေ့ပါတယ်။ ခွာကြည့်တော့ alarm လာတယ်။ system အလုပ်လုပ်တယ်ပေါ့။ Float switch ကလာတဲ့ ကြိုး ၂စ ကို တိုင်းပြီး float ball ကစားကြည့်တယ်။ float အပေါ်ရောက်ယင် close ဖြစ်ပြီး float အောက်ရောက်ယင် open ဖြစ်ပါတယ်။ reed switch ရော float ထဲက magnet ရော ကောင်းတယ်ပေါ့။ လိုအပ်လာယင် reed switch position ကို ကြည့်ရမှာပေါ့။
ဒါနဲ့ စက်-၂ ကို မေးကြည့်တယ်။ ဒီ float ball ဖြုတ်လိုရလားဆိုတော့၊ သူတို့ ဖြုတ်ပြီး service/clean လုပ်ဖူးတယ်တဲ့။ c-clip လေးဖြုတ်ပြီး ထုတ်ပြတယ်။ ကျွန်တော် float ball ကို ပြောင်းပြန်လှန်ပြီး စမ်းကြည့်တော့၊ float အပေါ်တက်ယင် open ဖြစ်ပြီး  အောက်ရောက်ယင် close ဖြစ်ပါတယ်။ မှန်သွားပြီပေါ့။ Magnet က float ball ရဲ့ တစ်ခြမ်းမှာဘဲ ပါတဲ့ type ဆိုတော့ ပြောင်းပြန်လှန်ယင် NO/NC ပြောင်းသွားတာပါ။

သင်္ဘောက ဆရာတွေ service လုပ်ယင်း ပြောင်းပြန်တပ်မိထားတာ ဖြစ်နိုင်ပါတယ်။
ဒီပြဿနာလေးမျိုးတွေ ကြုံရတတ်ပါတယ်။ ရှင်းရှင်းလေးကို သေချာ မတွေးမိယင် အတွေး ပိတ်သွားယင် ဖြစ်တတ်တာမျိုးပါ။ root cause ကို ရှာပြီး မပြင်ဘဲ အလုပ်ဖြစ်ပြီးရော modify လုပ်ခဲ့ယင် ကြာလာတော့ system မှာ ရှုပ်ထွေးကုန်တတ်ပါတယ်။
အတွေးပိတ်သွားတာနဲ့ ပါတ်သတ်လို့ ငယ်ငယ်က အမေပြောဖူးခဲ့တဲ့ အကြောင်းလေး ပြန်ဖေါက်သည်ချချင်ပါတယ်။ Technical term တွေနဲ့ တွေ့နေကျ ကျွန်တော့ စာတွေထဲမှာ တစ်ခါတလေ အပျင်းပြေပေါ့ဗျာ။
တစ်ခါက အမေတို့ရွာက ဦးနုံတစ်ယောက် ညနေ ယာထွန်ပြီး ပြန်မယ်လုပ်တော့ စဉ်းစားတယ်တဲ့။ မနက်ဖြန်ပြန်လာပြီး ထွန်ရဦးမှာဘဲ။ ဒီထွန်တုံး ထားခဲ့လိုက်မယ်။ နွားတွေသယ်ရသက်သာတာပေါ့ဆိုပြီး ထွန်တုံးကိုထားခဲ့တယ်တဲ့။ ဦးနုံပြန်သွားပြီး နောက်တတ်ပြောင်တတ်တဲ့ ကာလသား တစ်ယောက်က ထွန်တုံးရဲ့ ရှေ့ နွားဆွဲတဲ့ တုတ်တံ နှစ်ချောင်းကို စုချည်ထားတဲ့ ကြိုးကို ဖြည်။ ထွန်တုံးကို ထန်းပင်တစ်ပင်မှာ ခွပြီးပြန်ချည်ထားခဲ့တယ်တဲ့။
နောက်နေ့ ဦးနုံသူ့ယာကွက်ရောက်တော့ ထန်းပင်မှာ ခွနေတဲ့ ထွန်တုံးကိုကြည့်ပြီး စဉ်းစားတယ်။ ပါးစပ်ကလည်း တတွတ်တွတ် ရွတ်နေသတဲ့။ "မနေညမှ ထွန်တုံးကြားမှာ ပေါက်တဲ့ ထန်းပင်ဆိုလည်း ကြီးလွန်းတယ်။ တစ်ယောက်ယောက် ဆော့ပြီး အပေါ်ကစွပ်ရအောင်လည်း အမြင့်ကြီး" တဲ့။ ထွန်တုံး စုချည်ထားတဲ့ကြိုး ဖြုတ်လေ့မရှိဘူး ဆိုတဲ့ အတွေးက block လုပ်သွားတာမျိုး။
ကျွန်တော်တို့ trouble-shooting လုပ်ရင် human factor ကို လျှော့တွက်လို့ မရဘူးဆိုတာ ပြောခဲ့ပါရစေ။